Бейімбет Майлин ауданындағы ірі жобалар

Қостанай облысының әкімі Құмар Ақсақалов Бейімбет Майлин ауданына барған жұмыс сапарында бірқатар маңызды жобалармен танысты, ауыл шаруашылығы тауар өндірушілерімен кездесті, «Таза Қазақстан» республикалық экологиялық бағдарламасы аясында атқарылып жатқан жұмыстардың барысын тексерді. Аймақ басшысы аудан халқымен кездесіп, өңірдің әлеуметтік-экономикалық даму көрсеткіштерін баяндады. Тұрғындардың сауалдарына жауап берді.

Мемлекет басшысы халықаралық сауданы кеңейту және еліміздің транзиттік әлеуетін арттыру үшін логистикалық қуаттар мен құрғақ порттарды дамытудың маңыздылығын атап өтті.

Бүгінде облыста 2 халықаралық көлік-логистикалық кешені салынуда. Оның бірі – Қостанай қаласында, екіншісі – Бейімбет Майлин ауданындағы астық және майлы дақылдарды сақтау әрі өңдеуге, көкөніс сақтауға және көлік-логистикаға бағытталған «TOBOL CENTER KZ» өндірістік-логистикалық кешені. Жоба аясында жемшөп ұнын өндіру, май зауыты, қоймалар, силос паркі, контейнерлерге арналған алаң, теміржол тұйықтары желілері, логистикалық және кедендік бақылау аймақтары құрылады.

Ауданның ауыл шаруашылығы саласында айтарлықтай ілгерілеу көрсеткіштері бар. Күзгі орақ науқаны барысында дәнді және дәнді-бұршақты дақылдардың 75,1%-ы жиналды. «Кең Дала» бағдарламасы арқылы 29 ауыл шаруашылығы тауар өндірушісіне 2,1 млрд теңге несие берілді. Биыл 3 млрд теңгеден астам қаржыға 59 бірлік ауыл шаруашылығы техникасы сатып алынды.

«Варваринское» ЖШС аумағында қуаттылығы 40 МВт газ-поршеньді электр станциясы салынуда. Инвестиция көлемі – 14,3 млрд теңге. 35 жұмыс орны құрылады.

Бұл – кәсіпорынның меншікті энергетика саласындағы екінші ірі жобасы. Өткен жылы қуаты 22,6 МВт күн электр станциясы іске қосылған болатын.

«Таза Қазақстан» республикалық экологиялық бағдарламасы аясында ауданда 1 350 ағаш пен бұта отырғызылып, 9 қатты тұрмыстық қалдықтар полигоны санитарлық талапқа сай келтірілді, 44 стихиялық қоқыс орны жойылды.

• 09.09.2026
• 3