Амангелді ауданында тұрғын үй салу өсімі 121,1%-ке орындалды

Биыл Амангелді ауданында 1606 шаршы метр тұрғын үй пайдалануға беріліп, өсім 121,1%-ке орындалды.  Соңғы 3,5 жылда ауданда 10 мың шаршы метрден асатын 61 үй немесе 67 пәтер салынды. 2025 жылы 12 әлеуметтік пәтер сатып алынды. Биыл 1200 шаршы метр болатын 20 пәтерлі 10 үй бой көтеріп жатыр.

Амангелді ауданына барған жұмыс сапары барысында Қостанай облысының әкімі Құмар Ақсақалов бірқатар нысандарды аралады. Аймақ басшысы аудан жұртшылығымен кездесіп, өңірдің әлеуметтік-экономикалық дамуы туралы баяндады. Тұрғындардың сұрақтарына жауап берді.

Жалпы, Амангелді ауданының әлеуметтік-экономикалық дамуында нәтиже бар. Ірі қара 62,5 мыңға, жылқы 29,8 мыңға, қой-ешкі 82,3 мың басқа жетті.

Биыл 2150 тонна ет, 12,4 мың тонна сүт өндірілді. 193,4 мың га егістіктен 145 мың тоннаға жуық астық жиналды. 231 мың тонна шөп әзірленді. 1,5 млрд теңгеге 44 ауыл шаруашылығы техникасы сатып алынды.

1012 шағын және орта бизнес субъектісінде 1,8 мыңнан астам адам жұмыспен қамтылған.

«Таза Қазақстан» бағдарламасы аясында жыл басынан бері 70 мың тонна қоқыс шығарылды. 4 балалар ойын алаңы орнатылды. Елді мекендерді жарықтандыру деңгейі 93,3%-ке жетті.

Мемлекет Басшысының бұқаралық спортты дамыту жөніндегі тапсырмасына сай, былтыр Амантоғай ауылында спорт кешені салынды. 15 жұмыс орны құрылды.

• 28.09.2026
• 6