Қарттар күні: Ербол Қарашөкеев белгілі жазушы-драматург Елен Әлімжанның шаңырағына барды

Жамбыл облысының әкімі Ербол Қарашөкеев белгілі жазушы-драматург, публицист Елен Әлімжанның шаңырағына барып, оны 1 қазан – Халықаралық қарттар күнімен құттықтады.

Елен Әбдуатұлы Әлімжан – қазақ журналистикасы мен әдебиетіне өзіндік үлес қосқан қаламгер. Ол Қазақ ұлттық университетінің филология факультетін тәмамдаған. Еңбек жолын бұқаралық ақпарат құралдарында бастап, Қазақ телевизиясында комментатор, «Еңбек туы» (қазіргі «Ақ жол») газетінде тілші және бөлім меңгерушісі, Жамбыл облыстық партия комитетінде нұсқаушы, «Социалистік Қазақстан» (қазіргі «Egemen Qazaqstan») газетінің меншікті тілшісі, «Түркістан» газетінде бөлім меңгерушісі қызметтерін атқарған.

Сондай-ақ «Қазақ энциклопедиясы» баспасында жетекші маман, «Ақ жол» газетінде «Руханият» бөлімінің меңгерушісі, бас редактордың орынбасары, «Алтын шырақ» журналының редакторы болған.

Кездесу барысында өңір басшысы қаламгердің шығармашылық еңбегіне тоқталып, ел руханиятына сіңірген еңбегін атап өтті.

– Сіздей ағалардың ақылы мен өмірлік тәжірибесі біз үшін әрдайым қымбат. Ең бастысы, аға, деніңіз сау болсын. Бала-шағаңыздың, немере-шөберелеріңіздің қызығын көріп, отбасыңыздың ортасында аман-есен, абыройлы ғұмыр кеше беріңіз. «Қариясы бар елдің қазынасы бар» дейді ғой. Сіз де елдің ортасында ақыл-кеңесіңізді айтып, баталарыңызды беріп, төрімізде отыра беріңіз, – деді Ербол Қарашөкеев.

Өз кезегінде Елен Әлімжан көрсетілген құрмет пен ілтипатқа алғысын білдіріп, ел мен жердің амандығын тіледі.

Айта кетейік, Халықаралық қарттар күніне орай облыс әкімінің орынбасарлары өңірдегі еңбек және сала ардагерлерінің шаңырағына арнайы барып, құрмет көрсетті.

Атап айтқанда, облыс әкімінің бірінші орынбасары Нұржан Календеров денсаулық сақтау саласының ардагері Тұрсынкүл Әшірбаеваны, облыс әкімінің орынбасары Серік Сәлемов ақын Қайырбек Асановты, облыс әкімінің орынбасары Алтай Әлі еңбек ардагері Раушан Әміреқұлованы арнайы құттықтады.

• 02.10.2026
• 4