Ербол Қарашөкеев меркіліктермен кездесті

Жамбыл облысының әкімі Ербол Қарашөкеев Меркі ауданына жұмыс сапары барысында тұрғындармен кездесіп, өңірдің әлеуметтік-экономикалық даму барысы мен елді мекендердегі өзекті мәселелерді талқылады.

Жиын Мемлекет басшысының «Әкімдердің халықпен кездесулерін өткізу туралы» Жарлығына сәйкес еркін форматта өтті. Тұрғындар өз ұсыныс-пікірлерін айтып, көкейлеріндегі сауалдарын облыс әкіміне тікелей жолдады.

Алдымен өңір басшысы облыстың даму жоспары мен Меркі ауданының әлеуметтік-экономикалық көрсеткіштеріне тоқталды.

Ербол Қарашөкеевтің айтуынша, 2026 жылдың алғашқы сегіз айында аудандағы негізгі әлеуметтік-экономикалық көрсеткіштер бойынша оң динамика қалыптасқан. Бұған инвестициялық белсенділіктің артуы мен агроөнеркәсіптік кешендегі өндіріс көлемінің тұрақтылығы ықпал етіп отыр.

Қаңтар-тамыз айларында аудан экономикасына 24,9 млрд теңге инвестиция тартылды. Қазір аудан аумағында 43 ірі және орта инвестициялық жоба жүзеге асырылуда.

Құрылыс саласында биылғы сегіз айда 4,9 млрд теңгенің жұмысы орындалды. Тұрғын үй құрылысының көлемі 34,8 мың шаршы метрге жетті.

Аудан тұрғындарын сапалы ауыз сумен қамтамасыз етуге де басымдық берілген. 2025-2026 жылдары алты елді мекеннің су құбырларын қайта жаңғыртуға 3,4 млрд теңге бөлінді. Ақтоған, Кеңес және Гранитогорск ауылдарындағы жұмыстар аяқталып, нысандар пайдалануға берілді. Ал Ақарал, Жамбыл және Сыпатай ауылдарында құрылыс жұмыстары жалғасуда.

Көлік инфрақұрылымын дамыту аясында Меркі бекетіндегі теміржол өткелі арқылы өтетін жаяу жүргіншілер көпірінің құрылысына облыстық бюджеттен 102,4 млн теңге қарастырылды. Қазіргі уақытта құрылыс жұмыстары жалғасып жатыр.

Білім беру саласында Меркі ауылындағы «Балдәурен» бөбекжай-бақшасына күрделі жөндеу жүргізілді. Бұл мақсатқа 960 млн теңге бөлініп, жұмыстар толық аяқталды. Нысан пайдалануға берілді.

Ауыл шаруашылығы бағытында Жаңатоған ауылдық округіндегі Андас-3 су қоймасының құрылысы жалғасуда. Жобаны іске асыру үшін облыстық бюджеттен 1,1 млрд теңге бөлінген.

Газдандыру мәселесі бойынша Меркі аудандық әскери бөлімінің Кеңес және Аспара шекара заставаларының қазандықтарына газ тарту жұмыстары толық аяқталды. Оған облыстық бюджеттен 527,6 млн теңге бағытталды.

Өткен жылы тұрғындармен кездесу барысында көтерілген бірқатар мәселе де шешімін тапты. Атап айтқанда, «Алатау Су-Жылу» мекемесінің қызмет көрсету аясын кеңейту, Жауғаш батыр ауылы маңындағы республикалық жол бойында жол бойы сервистік кешенін ашу және Аспара ауылындағы дәрігерлік амбулаторияны қажетті жабдықтармен қамтамасыз ету жұмыстары атқарылды.

Ал Жауғаш батыр ауылындағы электр желілеріне бағаналар орнату жұмыстары осы айдың соңына дейін аяқталады деп жоспарланып отыр.

– Мемлекет басшысы өз Жолдауларында өңірлердің орнықты дамуы мен халықтың өмір сүру сапасын арттыруды мемлекеттік саясаттың басты басымдықтарының бірі ретінде айқындап келеді. Сондықтан жергілікті атқарушы органдардың негізгі міндеті – тұрғындардың әл-ауқатын жақсарту. Бұл бағыттағы жұмыстар барлық деңгейдегі әкімдердің үйлесімді іс-қимылы арқылы жүйелі түрде жүзеге асырылады.

 

Халық игілігі жолында атқарылған әрбір іс – қоғамдағы бірлік пен татулықтың, өзара сенім мен жауапкершіліктің нақты көрінісі. Бүгінгі жетістіктердің барлығы тұрғындардың қажырлы еңбегі мен ортақ мақсатқа жұмылған күш-жігерінің нәтижесі, – деді облыс әкімі.

Кездесу барысында тұрғындар кәріз жүйесін орталықтандыру, бюджет қаражатын тиімді пайдалану, тарихи-мәдени мұраларды сақтау, қолданыстағы мектептерді көгілдір отынмен қамту және жаңа білім ошақтарын салу мәселелерін көтерді. Сонымен қатар өзге де өзекті мәселелер бойынша ұсыныс-пікірлерін білдірді.

Ербол Қарашөкеев әрбір сауалға жан-жақты жауап беріп, көтерілген ұсыныстар мен өтініштердің назардан тыс қалмайтынын айтты.

Кездесу қорытындысында аймақ басшысы аудан әкіміне жүзеге асырылып жатқан жобалардың белгіленген мерзімде аяқталуын қамтамасыз етуді, мемлекеттік сатып алу рәсімдерінің заң талаптарына сай әрі уақытылы жүргізілуін, сондай-ақ бюджет қаражатының тиімді игерілуін қатаң бақылауда ұстауды тапсырды.

Сонымен бірге аудандық полиция бөлімі мен төтенше жағдайлар қызметіне қоғамдық қауіпсіздікті қамтамасыз ету, құқық бұзушылықтың алдын алу, жол қозғалысы қауіпсіздігін сақтау және төтенше жағдайлардың профилактикасын күшейту міндеттелді.

Кездесуден кейін өңір басшысы Меркі ауданының тұрғындарын жеке мәселелері бойынша қабылдады.

• 19.10.2026
• 6