Қазақстан Республикасының Президенті «Жаңа тарихи кезеңдегі Қазақстанның өзекті міндеттері» атты халыққа Жолдауын жариялады

Мемлекет Басшысы Қасым-Жомарт Тоқаев еліміздің әлеуметтік-экономикалық дамуы, ішкі және сыртқы саясатының негізгі бағыттары және алдағы айқын бағдары туралы «Жаңа тарихи кезеңдегі Қазақстанның өзекті міндеттері» атты халыққа Жолдауын жариялады. Жолдауды аймағымыздың тұрғындары зор ықыласпен қабылдады.

Президент ел өміріндегі тарихи өзгерістердің барлығы халықтың көз алдында болып жатқанын атап өтті.

Мемлекет басшысы келесі жылды Жалпыхалықтық ауқымды құрылыс жылы деп жариялауды ұсынып, азаматтарымыз толыққанды әлеуметтік инфрақұрылыммен қамтылуы керектігін, Қазақстан ауқымды құрылыс алаңына айналуға тиіс екендігін, барлық аймақта жаппай құрылысты бастап, жандандыру қажеттігін жеткізді. Конституцияда халықтың әл-ауқатын арттыру мемлекеттің стратегиялық басымдығы ретінде айқындалғанын, бұл бастамалардың барлығы ел игілігі, әсіресе өскелең ұрпақтың қамы үшін қолға алынып отырғанын баса айтты.

Президент Қазақстанның барлық аймағын байланыстыратын тұтас логистикалық желісін құру; ұлттық түрлі-түсті және сирек кездесетін металдардың қорын қалыптастыра отырып, елімізді жаһандық өндіріс тізбегіне қосу; Қазақстанның ауыл шаруашылығы саласына жасанды интеллектінің тәсілдерін енгізу; инвестор тарту және оларды жан-жақты қолдау жүйесін күшейту; жаңа Азаматтық кодекс қабылдау; ең төменгі жалақы мөлшерін 85 мыңнан 110 мың теңгеге дейін көтеру бағыттарына тоқталды.

«Қасым-Жомарт Кемелұлы елдегі бірнеше әуежайдың құрылысы қатар жүргізіліп жатқанын, соның ішінде Арқалықтағы әуежайды қалпына келтіру жұмысы аяқталғанын ерекше атап өтті. Қостанай облысы – еліміздің қарқынды дамып келе жатқан өңірлерінің бірі. Президент алға қойған міндеттер мемлекетімізбен бірге, біздің облысымыздың да дамуына серпін береді деген сенімдемін. Біз жүйелі жұмысымызды жалғастыра береміз», – деді Қостанай облысының әкімі Құмар Ақсақалов.

• 29.10.2026
• 6