Ақтоты Райымқұлова азаматтарды қабылдады

Қазақстан Республикасының Мәдениет және спорт министрі Ақтоты Райымқұлова онлайн форматта азаматтарды жұмыс және жеке мәселелері бойынша қабылдады.

Astana Opera Мемлекеттік опера және балет театрының жетекші солисі Әйгерім Бекетаева министрге музыка және балет өнерін жандандыруға жағдай жасап келе жатқаны үшін алғыс айтты.

Композитор, Қазақстанның еңбек сіңірген қайраткері Серік Еркімбеков жеке және шығармашылық сауалын қойды.

Ақтоты Райымқұлова Серік Еркімбековтің «Дом твоей мечты» мюзиклі, «Минарет», «Вечный огонь» балет қойылымын республикалық театрларда сахналауға қатысты сауалы Министрлік жанындағы музыка және хореография өнері бойынша көркемдік кеңесте қаралатынын, шешім сол жиында қабылданатынын жеткізді.

Осыдан кейін семсерлесуден халықаралық дәрежедегі спорт шебері Әлия Бектұрғанова аталған спорт түрі бойынша бірқатар сұрағына жауап алды.

Министр Нұр-Сұлтан қаласы Дене шынықтыру және спорт басқармасының №9 балалар мен жасөспірімдерге арналған спорт мектебі Назарбаев университетімен келісіп, залды жалға алғанын, қазір қала қызыл аймақта болғандықтан арнайы зал жабық тұрғанын айтты. Алдағы уақытта эпидемиологиялық ахуал тұрақталған соң жаттығу жұмысы қайта жанданады. Ал біліктілікті арттыру бойынша сауалына Министрлікке қарасты Дене шынықтыру және спорт бойынша республикалық оқу-әдістемелік және талдау орталығы жыл сайын біліктілікті арттыру курсын өткізетінін, Мәдениет және спорт министрлігінің 2014 жылғы 28 қазандағы бұйрығына сәйкес электорды түрде құжат тапсырып, аталған курсқа қатысуға болатынын жеткізді. Сонымен қатар биыл спортшы Қазақстан жастар құрамасына кіргендіктен (Мырзахметова, Исина, Исабекова) біліктілігі жоғары деңгейдегі бірінші санатты жаттықтырушы категориясын алатынын айтты.

Түркістан облысы, Зерделі ауылындағы Мәдениет үйінің директоры Ботагөз Ділдәбекованың аталған нысанды заңдастыру жөнінде сұрақ қойды. Ақтоты Райымқұлова бұл мәселе бойынша жергілікті атқарушы органға арнайы хат жазып, жауап берілетінін атап өтті.

• 12.04.2021
• 219