Мал ұрлығы 60 пайызға азайды

«Бұл туралы аймақ басшысы Махамбет Досмұхамбетовтің төрағалығымен өткен отырыста облыстық Полиция департаментінің басшысы Қамза Үмбетқалиев мәлімдеді»,- деп хабарлайды Атырау облыстық коммуникациялар қызметі.

⠀

Аталған жиынға облыс әкімінің орынбасарлары, басқарма мен құзырлы орган басшылары қатысты. Күн тәртібінде қаралған алғашқы мәселе мал ұрлығына қатысты өрбіді.

⠀

«Жергілікті атқарушы органдармен бірлесіп қабылданған шаралардың нәтижесінде, ағымдағы жылдың 2 айында жалпы мал ұрлығы қылмысының санын 60,9%-ға төмендеуіне қол жеткіздік»,- деді Қамза Үмбетқалиев.

⠀

Сондай-ақ, өңірдің бас полицейі өткен жылы 73 мал ұрлығының 58 пайызы қараусыз жайылымдардан ұрланғандығын айта келіп, мал иелерінің төрт түліктерін қараусыз қалдыруының себебімен түсіндірді.

⠀

Сонымен қатар, департамент басшысы қараусыз жануарларды иесі анықталғанға дейін уақытша ұстау үшін қоражайлар мен мал іздеуге арналған пилотсыз ұшатын аппараттарды сатып алу қажеттігін жеткізді.

⠀

Жиын соңында аймақ басшысы мал ұрлығы қылмыстарының ашылу сапасын арттыру, мал сату, сою, терілерін қабылдау орындары маңына бейнебақылау камераларымен қамтамасыз ету, қылмыс жолымен келген малдарды және өлі малдарды сатудың жолын кесіп, кінәлі азаматтарды жауапкершілікке тарту бағытында жұмыстарды жандандыруды тапсырды.

⠀

Айта кету керек, ауыл шаруашылығы басқармасының мәліметіне сәйкес, облыста 873 мыңнан астам мал бар.

• 13.04.2021
• 197