Облыстағы аудандарғы жұмыс сапарымды жалғастырдым.

Облыстағы аудандарғы жұмыс сапарымды жалғастырдым. Бұл жолы Шу ауданына ат басын бұрып, жол инфрақұрылымы нысандарының құрылыс барысын, су және ауылшаруашылығы нысандарының жай-күйін барлап, жергілікті мектептердегі оқу жағдайымен таныстым.

Аудан аумағында «Тараз» Химпарк» АЭА басшылығына жұмыс қарқынын арттыруды тапсырдым. Арнайы экономикалық аймақ құрылған сәттен бастап оның қызметі туралы есеп, сондай-ақ басқарушы компанияның жалақы қоры бойынша мәліметтер әзірлеуді тапсырдым. Шығындардың тиімділігіне де тексеру жүргізілетін болады.

Бұл ғана емес, Меркі-Шу-Бурылбайтал жолына айрықша көңіл бөлінуде десек, оның құрылыс барысы менің тұрақты бақылауымда. Осы жолғы жұмыс сапарым барысында Меркі мен Шу арасындағы тоғыз көпірге назар аудардым. «Қазавтожол» РМК басшысы Айжан Туғанованың айтуынша, қазіргі таңда көпірлер 70 пайызға дайын. Қыркүйек айына қарай олардың құрылысы толығымен аяқталуы тиіс. Құрылысшылар жолдың биыл ашылатынын сендірді.

Мердігерлерге әлеуметтік жауапкершілік туралы да ұмытпай, әлеуметтік мәселелерді шешуде жергілікті халыққа барынша қол ұшын созу керектігін де ескерттім.

Сондай-ақ, аудан аумағында орналасқан «Қазсушар» РМК балансындағы Тасөткел шағын бөгеті күрделі жөндеу жұмыстарының жобасын да барладым.

Бірлік ауылындағы құны 1,2 миллиард теңге болатын, сыйымдылығы 30 мың тоннаға дейінгі көкөніс сақтау қоймасының құрылысымен, Шу қаласындағы ауданы 6,5 гектарды құрайтын Теміржолшылар паркінің жаңғырту жұмыстарымен, Бірлікүстем және Қонаев ауылдарындағы жаңа мектептермен де таныстым. Жалпы Шу ауданы бойынша оқушылардың 99,1 пайызы қалыпты оқу үрдісіне көшкен.

• 13.04.2021
• 264