Өңірімізде алдағы жылдары көптеген медициналық нысан салынбақ

«Бұл туралы медицина саласын дамытуға қатысты отырыста облыстық денсаулық сақтау басқармасының басшысы Асхан Байдуалиев мәлімдеді»,- деп хабарлайды Атырау облыстық коммуникациялар қызметі.

«Ғимарат мәселесін шешу мақсатында, Өркен және Нұрсая ықшам аудандарында 250 келушіге арналған емхана салу және ауылдық елді мекендерде 9 медициналық-санитариялық алғашқы көмек объектісін салу жоспарлануда. Бұдан бөлек, Атырау қаласында 3 қосалқы станциясымен бірге жедел медициналық жәрдем станциясын салуды да жоспарлап отырмыз. Бұл жобалар Атырау облысын әлеуметтік-экономикалық дамытудың 2021-2025 жылдарға арналған жоспарына сай жүзеге асады»,- деді Асхан Байдуалиев.

Сондай-ақ, Атырау қаласында 250 келушіге арналған Психикалық денсаулық орталығы, 350 келушіге арналған көпфункциялды аурухана және Атырау облыстық онкология диспансері жанынан радиологиялық корпустың құрылысы жоспарда бар екенін жеткізді.

«Осы объектілерді іске қосу арқылы қан айналым жүйесі, онкологиялық, тыныс алу жолдары ауруларынан болатын, сондай-ақ нәресте және ана өлімін төмендетуге, онкологиялық ауруларды ерте анықтауға мүмкіндік аламыз»,- деді басқарма басшысы.

Жиын соңында аймақ басшысы Махамбет Досмұхамбетов ана мен бала өлімінің деңгейін төмендетуді, салаға қатысты мемлекеттік және аумақтық бағдарламалармен бекітілген көрсеткіштерге қол жеткізу бағытындағы жұмыстарды қолға алуды тапсырды. Сонымен қатар, өңірге қажетті денсаулық сақтау мамандарын тартуды, оларға уақытылы көтерме жәрдем ақының төленуі мен келген мамандарды баспанамен қамтылуын ұйымдастыруды міндеттеді.

• 14.04.2021
• 255