«Nur Otan» партиясы облыстық филиалының Саяси кеңесі бюросының отырысы өтті

15 сәуірде  облыс әкімі, «Nur Otan» партиясы облыстық филиалының төрағасы Амандық Баталовтың төрағалығымен облыстық партия филиалының Саяси кеңесі бюросының отырысы өтті. Онда бірқатар мәселелер талқыланды, - деп хабарлайды Алматы облысы әкімінің баспасөз қызметі.

Бірінші кезекте Саяси кеңес бюросының мүшелері биылғы жылдың 13 мамыры күні «Nur Otan» партиясының Алматы облыстық филиалының XХVIII есеп беру-сайлау конференциясын өткізу туралы қаулыны және конференцияда қаралатын мәселелерді бекітті.

Екінші мәселе бойынша партияның облыстық филиалы төрағасының бірінші орынбасары Гүлнар Тойлыбаева баяндама жасап, отырысқа қатысушыларға партияның сайлауалды бағдарламасының бағыттары бойынша құрылған 12 өңірлік қоғамдық кеңес төрағалары мен олардың мүшелерінің тізімін ұсынды. Ұсынылған құрам мен қоғамдық кеңестердің жұмыс ережелері дауыс беру қорытындысында бекітілді.

Жиында көтерілген үшінші мәселе - "Nur Otan" партиясының Алматы облыстық, аумақтық филиалдарының есеп беру-сайлау жиындарының, бастауыш партия ұйымдарының есеп беру-сайлау жиындарының және Саяси кеңес бюролары отырыстарының кестесін бекіту мәселесі. Қаулының жобасы Саяси кеңес бюросының мүшелері тарапынан қолдау тапты. 

Жиын соңында Амандық Баталов «Nur Otan» партиясының сайлауалды бағдарламасындағы алға қойылған міндеттерді сапалы жүзеге асыруда бірлескен жұмыстың маңыздылығын атап өтті. 

• 19.04.2021
• 202