Тағы бір сервистік-дайындау орталығы іске қосылды

Ұйғыр ауданында сервистік-дайындау орталығы құрылды. Облыс әкімдігінің қолдауымен 550 млн. теңгеге орталыққа 39 ауыл шаруашылығы техникасы, соның ішінде жоғары технологиялы тұқым сепкіш, комбайн және ілу құралдары сатып алынды, - деп хабарлайды Алматы облысы әкімінің баспасөз қызметі.

Көктемгі егіс науқанында сервистік дайындау орталығының құрылуы өңір шаруалары үшін зор мүмкіндіктер беріп отыр. Қазір сатып алынған барлық заманауи техникалар көктемгі дала жұмыстарына қолданылуда.

«Алтын Дән Шонжы» СДО бас директорының орынбасары Құралбек Бекмұханбетовтің айтуынша, Орталықтың техникалық паркі қазір Бахар ауылдық округінің аумағында іске кіріскен.

- Шаруа қожалықтарына техникалық қызмет көрсетумен, егін егу және өнім жинау науқандарында тракторлар мен комбайндардың үздіксіз жұмыс істеуін қамтамасыз етумен айналысамыз. Сонымен шектеліп қалмай, аудан алқаптарында өсірілген ауыл шаруашылығы өнімдерін бір орталықта сақтау мен бір орталықтан тарату жұмысын ұйымдастырып, процестің басынан аяғынан дейін қатысамыз. Сервистік дайындау орталығының қызметіне бізбен келісімшарт жасасқан кез келген шаруашылық жүгіне алады, - дейді Қ.Бекмұханбетов.

Бұл «Алтын дән Шонжы» СДО-сы «Жаркент крахмал сірне зауыты» ЖШС базасында ұйымдастырылды. Негізінен жүгері мен дәнді дақылдар өсіруде қызмет көрсетеді. Мұнда барлығы 39 ауыл шаруашылығы техникасы, соның ішінде жоғары технологиялы тұқым сепкіш, комбайн және ілу құралдары сатып алынды. Техника алғашқы 2 жылда үзілісті кезеңмен жалпы 10 жылға лизингіге берілді.

   Бүгінгі күні Алматы облысында «Қант қызылшасы», «Жүгері», «Дәнді дақылдар», «Көкөністер», «Күріш», «Картоп», «Жем-шөп» бағыттарында 51 СДО жұмыс істейді. Жалпы сомасы 11 млрд. теңгеге жуық қаржыға 1200-ден астам бірлік арнайы техника қаржы лизингісіне сатып алынды. СДО төңірегіне 250-ден астам ұсақ және орта шаруашылық біріктірілген. 1 мыңдай тұрақты, 12 мың шамасында маусымдық жұмыс орны құрылған.   

• 19.04.2021
• 220