«Қазақстан Республикасының кейбір заңнамалық актілеріне норма шығаруды жетілдіру мәселелері бойынша өзгерістер мен толықтырулар енгізу туралы» заң жобасының тұсаукесері

2020 жылғы 11 ақпанда Қазақстан Республикасы Парламенті Мәжілісінде «Қазақстан Республикасының кейбір заңнамалық актілеріне норма шығаруды жетілдіру мәселелері бойынша өзгерістер мен толықтырулар енгізу туралы» заң жобасының (бұдан әрі мәтін бойынша – заң жобасы) тұсаукесері өтті. Заң жобасын әзірлеуші орган Қазақстан Республикасы Әділет министрлігі болып табылады.
Іс-шараға Қазақстан Республикасы Парламенті Мәжілісінің депутаттары, мемлекеттік органдардың, ғылыми қоғамдастықтың өкілдері қатысты.
Әділет Вице-министрі Н.В. Пан заң жобасында қамтылған негізгі ережелерді ұсынды.
Заң жобасын әзірлеу алдыңғы қатарлы әлемдік тәжірибені ескере отырып, Қазақстанда норма шығару процесін жетілдіруге бағытталған. Мақсатқа қол жеткізу құқық қолдану тәжірибесіндегі проблемаларды жою, «ақылды реттеу» қағидаттарын пайдалануды кеңейту, ведомствоаралық үйлестірудің тиімділігін арттыру, Үкіметтің заңнамалық бастамаларын талқылау процесіне азаматтардың көп санын тарту жөніндегі міндеттерді іске асыру арқылы болжанады. Заң шығарушылықтың болжамды-талдамалық құраушысын жақсарту, ғылыми сараптама рәсімдерін жетілдіру қажеттілігі бар.
Қазақстан Республикасы Заңнама және құқықтық ақпарат институтының директоры Р.Қ. Сәрпеков пен директордың орынбасары В.Т. Қонысова өз сөзінде аталған заң жобасы аясында әзірленген ғылыми құқықтық сараптама жүргізудің жаңа моделін таныстырды.
Ғылыми құқықтық сараптама жүргізудің ұсынылып отырған тәртібін қабылдау ғылыми сараптама жүргізудің жеделдігін, тиімділігі мен ашықтығын арттырады.
«Қазақстан Республикасының кейбір заңнамалық актілеріне нормашығармашылықты жетілдіру мәселелері бойынша өзгерістер мен толықтырулар енгізу туралы» Қазақстан Республикасының Заңы жобасының мәтінімен Сіз «Ашық НҚА» порталында және Қазақстан Республикасы Әділет министрлігінің веб-сайтында таныса аласыз.

• 14.02.2020
• 637