Ауылына қарап, азаматын таны

Алматы облысы әкімдігінің ағымдағы жылдың 23 ақпанындағы «Облыстың елді мекендерін көктемгі-күзгі санитарлық тазарту, абаттандыру және көгалдандыру екі айлығын өткізу туралы» №62 Қаулысын негізге ала отырып, жуырда санитарлы-эпидемиологиялық талаптарды сақтай отырып, ауданымыздың барлық ауылдық округтерінің елді мекендерінде сенбілік ұйымдастырылды.

Аудан орталығы Сарыөзек ауылында да сенбілік ұйымдастырылып, бөлім, мекеме ұжымдары қажетті құрал-саймандарды алып, көшелерді тазартуға, көгалдандыруға, абаттандыруға шықты. Саябақтардағы барлық ағаштардың түптері қопсытылып, діңгектері әктелді.

Сенбілікке қатысушылардың бірі - Аружан Құрманалина: «Біз сияқты жастардың сенбілікке шығуы қызықты әрі пайдалы. Таза ауада тыныстап, әр талдың түбін әктеген маған ұнады. Ауылымыздың саябақтарын көріктендіргеніміз, аулаларымызды тазартқанымыз өзіміз үшін қажет. Бұған дейін де мектепте оқып жүргенімізде сенбіліктерге шығып, тазалық жұмыстарына қатысатынбыз. Ал бүгінгі сенбілікке шығуым мен үшін ерекше болды. Мен жастар практикасымен бір мекемеде іс-тәжірибеден өтудемін. Сенбілікке шығып, ауылымызды көрікті етуге өз үлесімді қосуға, белсенділік танытуға әрқашанда әзірмін» дейді.

«Ауылына қарап, азаматын таны» дегендей, әрқайсымыз ұйымдастырылған сенбіліктерге атсалыссақ, айналамыз таза, көрікті болары сөзсіз.

А.ҚАСЕНОВ

• 30.04.2021
• 318