Депутаттар жыл басынан бері халыққа 87 млн. теңгеге көмек көрсеткен

27 сәуір күні Алматы облыстық мәслихатының хатшысы Жанболат Жөргенбаев хатшылық қызметіне сайланғанына 100 күн толуына байланысты және VII шақырылымдағы мәслихат жұмысының алғашқы қорытындылары бойынша «Jetisy media» КММ алаңында өткен брифингіге қатысты, – деп хабарлайды Алматы облыстық мәслихатының баспасөз қызметі.
Жанболат Жөргенбаев облыстық және аумақтық мәслихаттың, оның органдары мен депутаттарының 1-ші тоқсандағы жұмыс қорытындылары, 2021 жылға жоспарлары жайында ақпарат беріп өтіп, тілшілердің сауалдарына жауап берді.
Өңірдегі мәслихат депутаттарының сандық, сапалық құрамы, өткізген сессия отырыстарында қаралған мәселелер, сонымен қатар тұрақты комиссиялардың жұмысына тоқталып, алдағы жұмыс жоспарларымен бөлісті. Сонымен қатар, депутаттық сауалдар, азаматтарды қабылдау және оның нәтижесі, өткізілген шаралар, қайырымдылық көмек пен әлеуметтік желідегі жұмыстары жайында да құлағдар етті.
Жанболат Әкебайұлы өз сөзінде «Жыл басынан 3 кезекті, 1 кезектен тыс сессия отырысы өтіп, облыстық мәслихат депутаттары 44 депутаттық сауал жолдады, шешілу жолдары бойынша қазіргі таңда жергілікті атқарушы органдар тарапынан жұмыстар жүргізілуде» - деп атап өтті.
Қоғамдық қабылдаулардың маңыздылығын атап өтіп, қабылдаудағы сұрақтарда берілген 391 (56,4%) өтініш оңтайлы шешілді, қалған 302 мәселе бойынша тиісті түсініктеме беріліп, халық қалаулылары тарапынан жалпы сомасы 87 578 500 теңгені құрайтын 3003 адамға қайырымдылық қызмет көрсетілгенін жеткізді.

• 04.05.2021
• 249