Ата-бабаларын ұмытпау болашақ ұрпақ үшін маңызды

Қазақстан Қарулы Күштері Әскери–тарихи музейінің өкілдері Ұлы Отан соғысындағы Жеңістің 76 жылдығына арналған «Жастарды патриоттық тұрғыда тәрбиелеу мен Отан қорғау кезінде қаза тапқандарды мәңгі есте сақтаудағы іздестіру қозғалысының рөлі» атты бірлескен онлайн-конференцияға қатысты.

Қарулы Күштердің Әскери-тарихи музейі, Л.Гумилев атындағы Еуразия ұлттық университеті қызметкерлерінің, іздестіру қозғалысы өкілдерінің, Қазақстан мен Ресейдің ардагерлер мен жастар ұйымдары мүшелерінің басын қосқан іс-шара oнлайн-форматта өтті.

Іс-шараның мақсаты – Ұлы Отан соғысы майданында ерлікпен шайқасқан батырларды еске алу, іздестіру қызметі саласындағы өзара іс-қимылды және екі елдің әскери-тарихи мұражайлары арасындағы ынтымақтастықты талқылау.

Іс-шарада Қарулы Күштер Әскери-тарихи музейінің бастығы полковник Нұртаза Әсілов іздеу қызметі жас ұрпақты бабалар жолымен батырлық үлгісінде тәрбиелеуде өте маңызды рөл атқаратынын атап өтті.

Майданға аттанған бір жарым миллион қазақстандықтың 270 мыңнан астамы хабар-ошарсыз кетті.

Қазақстан Қарулы Күштерінің Әскери-тарихи музейінде іздестіру-экспедициялық бөлімшесі 2019 жылдан бастап жұмыс істейді. Онда қаза тапқан және хабар-ошарсыз кеткен қазақстандықтарды іздестіру, оларды мәңгі есте сақтау және бірыңғай деректер базасын құру түрінде есепке алу бойынша жұмыстар жүргізілуде.

• 05.05.2021
• 253