Шағын несиенің шапағатын аз қамтылғандар мен көп балалы отбасылар да көріп отыр

Алматы облысында аз қамтылған және көп балалы отбасылар Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасына қатысып, шағын несиеге қол жеткізіп, өз ісін жүргізуге кірісуде. Мәселен, Көксу ауданының тұрғыны, алты баланың әкесі Жандос Қанабатыров бағдарламаның екінші бағыты бойынша мал шаруашылығымен айналысуға 4 млн. теңге алып, ірі қара өсіруге бел буды - деп хабарлайды Алматы облысы әкімінің баспасөз қызметі.

Бұған дейін шекара қызметінде әскери қызметте болған Ж.Қанабатыров қазір запастағы аға лейтенант. Қарап жатпай бала-шағасының ризығын арттырып, мал өсірсем деген отағасы мемлекет қолдауының арқасында 4 пайыз жеңілдетілген несиемен 14 ірі қара сатып алған. Қазір сиырдан алынған өнімдері - сүт, құрт, ірімшік, сары май, кілейгей, айран  Балпық би ауылында тұрақты саудаланады. Әзірге 1 адамды жұмысқа алған.

Жеке кәсіпкердің 5 ұл, 1 қызы бар. Балаларының алды ер жетсе, кішкентайы 3 айлық нәресте. Үлкендері әкесінің шаруашылығына көмектесуге жарап қалған.  

- Осындай бағдарламаға қатысуға болатыны, жеңілдіктер бар екенін басылым беттерінен оқып білдім. Сосын қатысып көру керек деп шештім. Жеңілдікпен алған шағын несиеме мал алып, іс бастап жатырмыз. Қазір, шүкір, мал қарауға, күтіп-баптауға ұлдарым көмектеседі. Алдағы уақытта трактор жүргізуші мамандығын оқып, сиырлардың жем-шөбін өзім әзірлесем деп ойлаймын. Оған қоса ірі қара тұқымын асылдандырып, бірте-бірте сүтті бағытты да қолға алу жоспарымда бар, - дейді Жандос Қанабатыров.

Облыстық жұмыспен қамтуды үйлестіру және әлеуметтік бағдарламалар басқармасының мәліметіне қарағанда биылғы жылдың бірінші тоқсанында Ақсу, Көксу, Панфилов, Сарқан аудандары мен Текелі қаласында осы санаттағы бірнеше отбасы мүшелері «Еңбек» бағдарламасы бойынша жеңілдіктерге қол жеткізіп, өз істерін бастады.

Жалпы 2020 жылы бағдарлама аясында аз қамтылған және көп балалы отбасыларға шағын несие беру шарттары жеңілдетілген. Атап айтқанда, микрокредит алу мерзімі 5 жылдан 7 жылға дейін ұлғайтылды, микрокредит беру көлемі 6-дан 8 мың АЕК-ке дейін ұлғайды, бұл ретте номиналды сыйақы мөлшерлемесі 6%-дан 4%-ға дейін төмендеді. Бұл мақсатқа облыста 2021 жылы бюджеттен 300 млн.теңге бөлінді.

Өткен төрт айда ауылдық жерлердегі тұрғындарға 66,4 млн. теңгеге 16 шағын несие берілді. Ал жалпы осы «Еңбек» бағдарламасын іске асыруға 17,8 млрд.теңге қарастырылған. 

• 14.05.2021
• 224