ЕҚЫҰ ПА-да репатриацияланған азаматтарды теологиялық оңалту бойынша Қазақстанның тәжірибесі қаралды

18 мамырда «Шетелдік лаңкес-содырларды соттық қудалау, оңалту және қайта интеграциялау: Қазақстан тәжірибесі» тақырыбында Еуропадағы Қауіпсіздік және Ынтымақтастық Ұйымы (ЕҚЫҰ) Парламент Ассамблеясының онлайн-тыңдауы өтті.

Іс-шараға Дін істері комитеті төрағасының орынбасары Бауыржан Бакиров қатысты.

Отырыста ЕҚЫҰ Парламент Ассамблеясының Терроризмге қарсы арнайы комитетінің төрағасы Лопатко Рейнхольд төрағалық етті.

Жалпы іс-шараға ЕҚЫҰ Парламент Ассамблеясының 20 елден астам мүшелері, Қазақстандағы ЕҚЫҰ бағдарламалық кеңсесінің басшысы Фробарт Фолькер, сондай-ақ ҚР орталық мемлекеттік органдарының өкілдері қатысты.

Қазақстандық тарап отырыс қатысушыларына террористік белсенді аймақтардан қайтарылған азаматтарды репатриациялау және оңалту бағдарламалары бойынша тәжірибесімен бөлісті («Жусан» операциясы арқылы).

Өз кезегінде Б. Бакиров қайтарылған азаматтарды теологиялық-психологиялық оңалту бойынша Министрлікпен атқарылып жатқан жұмыстар туралы баяндама жасады. Бұл ретте, қатысушылар қайтарылғандарды оңалту бағдарламаларын ұйымдастыру бойынша Қазақстан Үкіметінің үлкен жауапкершілігін ерекше атап өтті.

Естеріңізге сала кетейік, «Жусан» гуманитарлық операциясы біздің азаматтарымызды террористік белсенділік аймақтарынан қайтару бойынша 2019 жылы басталған болатын. Операция қорытындысы бойынша қазіргі уақытқа дейін 700-астам азамат елге оралды, олардың басым бөлігін әйелдер мен балалар құрайды.

• 21.05.2021
• 321