«Бейбітшілік пен келісім» республикалық жобасы

Осыдан бір жыл бұрын Жамбыл облысында ұлтаралық келісімді сақтауға және нығайтуға бағытталған «Бейбітшілік пен келісім» республикалық жобасы басталған болатын. Өткен жылы жоба аясында арнайы жұмыс топтары қызметінің арқасында жамбылдықтардың көптеген мәселелерін шешуге мүмкіндік туды. Ағымдағы жылы да жоба аясында аз шаруа атқарылған жоқ десек, ол туралы менің төрағалығымен өткен кеңесте жан-жақты сараланды.

 «Бейбітшілік пен келісім» жобасы аясында тұрғындар өз мәселелерін шешуде мемлекеттің қолдауы мен көмегін сезінуі тиіс.

Бұл жоба жамбылдықтарды ұйыстыра түсті. Оны іске асыруға тек мемлекеттік қызметшілер ғана емес, сондай-ақ қоғамдық бірлестіктердің мүшелері де атсалысуда. Алдымен облыстың бірнеше ауданындағы ондаған елді мекен қамтылды. Содан кейін біз арнайы штаб құрдық. Енді жобамен 145-тен астам елді мекен қамтылуда.

Облыстық ішкі саясат басқармасының басшысы Бейқұт Жамангөзовтың айтуынша, ауыл тұрғындары негізінен ауыз су мен суармалы судың тапшылығы, жайылымдарға қатысты мәселелер бойынша жүгінуде.

Жұмыспен қамтуды үйлестіру және әлеуметтік бағдарламалар басқармасының басшысы Жорабек Баубеков түрлі этнос өкілдері шоғырланған жеті аудандағы әлеуметтік-тұрмыстық мәселелерді шешу және кәсіпкерлікті дамыту жөніндегі жұмыстың қорытындылары туралы баяндады.

Сонымен қатар, жеті ауданда бос жұмыс орындар жәрмеңкесі өтіп, тұрақты жұмыс орындарына 347 адам орналасса, жастар тәжірибесіне 245 түлек, әлеуметтік жұмыс орындарына 90 адам, ақылы қоғамдық жұмыстарға 129 адам тартылған. Жұмыс тиімділігін арттыру үшін «Бейбітшілік пен келісім» жобасын іске асыруға жауапты ретінде ауылдық округ әкімдіктері аппараттарынан бір қызметкерден бекітуді тапсырдым.

• 24.05.2021
• 308