Әкімшілік рәсімдік-процестік кодекстің негізгі ережелері түсіндірілді

Өткен жұма күні Алматы облысына жұмыс сапарымен ҚР Әділет министрі Марат Бекетаев келді. Сапар аясында 1 шілдеден бастап күшіне енетін жаңа Әкімшілік рәсімдік-процестік кодекстің енгізілуіне байланысты жұмыс барысындағы өзгерістер туралы облыс әкімі Амандық Баталовтың төрағалығымен жиын өткізілді. Жиынға ҚР Әділет министрлігінің, аталған ведомствоның аумақтық департаменттерінің, облыстық соттың, ҚР Мемлекеттік қызмет істері агенттігі департаментінің өкілдері және басқа да жауапты тұлғалар қатысты, - деп хабарлайды Алматы облысы әкімінің баспасөз қызметі.

Әділет министрі Марат Бекетаев кодекстің басты мақсаты қоғамда даулы мәселелердің туындауын азайту, мемлекеттік органдар мен азаматтардың арасындағы келіспеушіліктерді сотқа жеткізбей әуел бастан тиімді шешу екенін атап өтті. Жаңа кодекс билік органдарымен арадағы дауларды қарау кезінде жоғары тұрған органдарда немесе сотта азаматтар құқықтарын қорғаудың тиімді механизмдерін қамтамасыз етуге, сол сияқты азаматтардың басқару шешімдерін қабылдау процесіне нақты қатысуға мүмкіндік беретін кепілдіктер жиынтығын нығайтуға бағытталған. Құжаттың басты міндеті әкімшілік процестерді жүзеге асырумен, сондай-ақ мемлекеттік басқару саласында дауларды шешуге қатысты әкімшілік сот өндірістерімен тікелей байланысты қоғамдық қатынастарды реттеу болып табылады.

Жиын барысында облыстағы мемлекеттік органдардың өкілдері аймақта жүргізілген дайындық жұмыстары мен түсіндіру шаралары туралы айтып өтті. Сол сияқты толғандырған сауалдарын қойып, жұмыстың жаңа кезеңіне өтудің сапасын жақсартуға қатысты бірқатар ұсыныстарын жеткізді. Бұл ретте Қазақстан Республикасы Президенті жанындағы Мемлекеттік басқару академиясы филиалының базасында 1 шілдеге дейін 3839 мемлекеттік қызметші оқытылады. Бүгінгі күнге соның 3300-дейі оқу курсынан өтіп үлгерген.

Кездесу соңында облыс әкімі Амандық Баталов жаңа кодекс Президенттің «Халық үніне құлақ асатын мемлекет» тұжырымдамасы шеңберінде қабылданғанын атап өтті. Оның талаптарын орындау – жалпыға бірдей маңызды міндет екенін еске салды.

- Осы кодекстің енгізілуі нәтижесінде өтініштерді қарау кезіндегі жауаптылық екі есеге салмақтана түседі, өтініштерде айтылған мәселелерді шешудің сапасы жақсарады. Біз өз тарапымыздан жұмысты уақытылы әрі сапалы ұйымдастыру үшін барлық қажетті шараларды қабылдаймыз, - деді А. Баталов.

• 14.06.2021
• 205