Облыстағы мемлекеттік қызметшілердің кәсіби күні аталып өтілді

Алматы облысында мемлекеттік қызметшілер күні Талдықорғандағы Б.Римова атындағы драма театрында аталып өтілді. Кәсіби мерекеге орай облыс әкімінің бірінші орынбасары Лаззат Тұрлашов құттықтау сөз сөйледі.

Л.Тұрлашов өз сөзінде мемлекеттік органдар қызметін жетілдіру, мамандардың біліктілігін арттыру бағытында атқарылып жатқан жұмыстарға тоқталды. Ел Президенті мен Үкімет тарапынан белгіленген стратегиялық бағдарламалар мен жалпыхалықтық жобаларды іске асырудағы мемлекеттік қызметшілердің біліктілігі мен сауаттылығы, өз міндетін жауапкершілікпен атқаруы аса маңызды екенін атап өтті.

- Осы жыл – біздің облысымыз үшін ерекше айтулы кезең. Отанымыз Қазақстан тәуелсіздіктің 30 жылдық белесіне жетті. Сонымен қатар Алматы облысының орталығы Талдықорған қаласына көшірілгеніне 20 жыл болды. Осы мерейлі даталардың аясында біз еліміздің тарихын, тәуелсіздіктің шежіресін, мемлекеттік қызметтің мән-маңызын бұрынғыдан терең ұғына түсеміз. Мемлекеттік қызметші – елдің айнасы. Ол өзінің ақыл-ойымен, іс-әрекетімен басқаларға үлгі болуы тиіс. Мемлекеттік қызметшінің абыройы, жетістігі мен жеңісі – өзінің ғана емес, мемлекеттің ортақ игілігі. Сондықтан сіздерге жүктелер жауапкершілік жүгі салмақты. Қазіргі саяси жаңғыру кезеңінде жетісулық мемлекеттік қызметшілер жаңа еңбек жағдайына бейімделіп, креативті көзқараспен жұмыс істейді деп сенемін, - деді Л.Тұрлашов.

Мұнан соң Қазақстан Республикасы Мемлекеттік қызмет істері агенттігінің Алматы облысы бойынша департаментінің басшысы Ләззат Бейсеқұлова сөз алып, әріптестерін кәсіби мерекемен құттықтады. Сондай-ақ ол мемлекеттік қызмет саласындағы реформалар туралы да айтып өтті.

Сол сияқты облыстық дене шынықтыру және спорт басқармасының басшысы Нұрбақыт Теңізбаев пен Талдықорған қаласы әкімі аппаратының бас маманы Мәди Шәкенов те әріптестеріне ізгі тілектерін білдірді.

Шарада бірқатар мемлекеттік қызметшілер облыс әкімінің Құрмет грамотасымен, Алғыс хатымен, Қазақстан Республикасы Мемлекеттік қызмет істері агенттігі төрағасының грамотасымен, Орталық сайлау комиссиясы төрағасының дипломымен марапатталды. Сол сияқты «Үздік мемлекеттік қызметші» төсбелгісі облыс әкімінің бірінші орынбасары Л.Тұрлашов пен Алматы облысы бойынша Мемлекеттік кірістер департаментінің басшысы Сырым Дыңбаевқа берілді.

Шара соңы мерекелік концертпен аяқталды.

• 23.06.2021
• 216