«Елорда – өнер өлкесі» атты театрлардың шығармашылық кездесуі аяқталды

Қалибек Қуанышбаев атындағы мемлекеттік академиялық қазақ музыкалық-драма театрында «Бопай ханым» тарихи трагедиясымен «Елорда – өнер өлкесі» атты театрлардың шығармашылық кездесуі аяқталды. Ел тәуелсіздігінің 30 жылдығы мен елорда күніне орай Мәдениет және спорт министрлігі мен Нұр-Сұлтан қаласының әкімдігі ұйымдастырған алғашқы театр фестиваліне елімізбен қатар Өзбекстан мен Қырғыз Республикасының өнер ошақтары қатысты.  

«Бопай ханым» қойылымын көрермендермен қатар Мәдениет және спорт министрі Ақтоты Райымқұлова, Мәдениет және спорт вице-министрі Нұрғиса Дәуешов пен шығармашылық кездесуге келген театр жетекшілері тамашалады.  

Ақтоты Райымқұлова бұл шығармашылық кездесуі бауырлас елдер арасындағы мәдени байланысты жандандыруға тың серпін беретінін айтты.

«Бүгін ел тәуелсіздігінің 30 жылдығы мен елорда күніне орай ұйымдастырылған «Елорда – өнер өлкесі» атты театрлардың шығармашылық кездесуі мәресіне жетіп жатыр. Алғаш рет өткен тетар фестиваліне көршілес, бауырлас Өзбекстан мен Қырғыз Республикасының өнер ошақтары келді. Барлық тетар таңдаулы қойылымдарын сахналап, қала тұрғындары мен қонақтарына ұсынды.

Көршілес мемлекеттердің театрларымен арадағы байланысты нығайту, Нұр-Сұлтан қаласын мәдени орталық ретінде ілгерілету, көрермендерді театр өнеріндегі таңдаулы қойылымдармен таныстыруды мақсат еткен «Елорда – өнер өлкесі» өз іргетасын мықтап қалады деп сенемін. енді жыл сайын орныққан әріптестік жанданып, жоғары деңгейге жалғаса берсін. Шығармашылық кездесу аясында өткен семинарлар, шеберлік сабақтары қатысушыларға пайдасын тигізді деп ойлаймын.

Жалпы адами құндылықтарды насихаттап, халықты ізгілікке үндейтін театр өнері өз миссиясын қалтқысыз атқаруды тоқтатқан емес. Мәдениет және спорт министрлігі пандемияға қарамастан мәдениет ошақтарын қаржыландыруды тоқтатпады. Біз осы арқылы күнделікті өмір салтынан қол үзіп қалған халықтың еңсесін тіктеуге үлес қосып келе жатырмыз. Барлық қатысушы театрға сәттілік пен бай репертуар тілеймін! Біз Сіздермен осындай алқалы фестивальдерде бірлесе өнер көрсетуге, ынтымақтастық орнатуға әрқашан дайынбыз»,-деді.

Ал сөз соңында Қ.Қуанышбаев атындағы театдың халық аспаптар ансамблін халықаралық фестивальде жүлдегер атануымен құттықтады.

«Осы орайда Қ.Қуанышбаев атындағы мемлекеттік академиялық қазақ музыкалық-драма театрының Халық аспаптар ансамблі Еуропа фольклорлық фестивальдер қауымдастығының қолдауымен өткен AsiaFolk 2021 онлайн фестивалінде Гран-при, ал домбрашылар ансамблі І дәрежелі Дипломға ие болды. Сонымен қатар Францияда өткен NOUVELLES ETOILES атты халықаралық онлайн-байқауда «Классика және джаз» номинациясында 1-ші орын алғанын айта кеткім келеді. Ансамбль мен көркемдік жетекшісі әрі дирижері Маралжан Мырзақұлованы шын жүректен құттықтаймын»,-деді министр.

Қойылымнан кейін Ақтоты Райымқұлова барлық қатысушы ұжымға арнайы диплом табыстады. 

• 01.07.2021
• 366