Жамбыл ауданында мереке қарсаңында 2 дәрігерлік амбулатория ашылды

Тәуелсіздіктің 30 жылдығы мен Астана күні аясында Алматы облысында екі ауылдық дәрігерлік амбулатория іске қосылды. Жамбыл ауданының Сарыбай би және Үңгіртас ауылдарында қажетті заманауи медициналық құралдармен жабдықталған жаңа емдеу мекемелері салтанатты түрде ашылды, - деп хабарлайды Алматы облысы әкімінің баспасөз қызметі.

Сарыбай би ауылындағы емдеу мекемесі бір ауысымда 25 адамды қабылдай алады. Нысан ендігі жерде Қарасу ауылдық округіндегі 4 елді мекеннің 6 мыңнан астам тұрғынына сапалы медициналық қызмет көрсететін болады. Жобаның жалпы құны - 297 млн. теңге.

Үңгіртас ауылында да осындай дәрігерлік амбулаторияның ашылуы ауыл тұрғындары үшін ерекше қуаныш болды. Жаңа емхананың жобалық құны - 338 млн. теңге. Мұнда балалар мен ересектерге арналған қабылдау бөлмесі, стоматолог, гинеколог, терапевт кабинеттері, зертхана, күндізгі стационар, жара таңу бөлмесі бар. Бұл жерде Үңгіртас ауылдық округінің 5 мыңдай тұрғыны медициналық қызмет ала алады.

«Дәрігерлік амбулаторияда жаңа медициналық құрал-жабдықтар орнатылған. Нысан бір ауысымда 35 адам қабылдауға арналған. Біздің ұжымда 12 қызметкер бар. Біз ауыл тұрғындарына сапалы қызмет көрсетуге бар күш-жігерімізді бағыттаймыз», - деді Үңгіртас ауылдық амбулаториясының меңгерушісі Бағлан Тобажанова.

Алматы облысы әкімінің баспасөз қызметі.

• 08.07.2021
• 193