Ақтоты Райымқұлова Екатерина Дуловамен жүздесті

Бүгін Қазақстан Республикасының Мәдениет және спорт министрі Ақтоты Райымқұлова Витебск қаласына іс-сапары аясында Беларусь мемлекеттік музыка академиясының ректоры Екатерина Дуловамен жүздесті.

Ақтоты Райымқұлова екі мемлекеттің жетекші мәдениет мекемелері арасындағы әріптестіктің белсенді дамып келе жатқанын атап өтті.

«Біздің шығармашылық ұйымдар арасындағы екі жақты тығыз ынтымақтастық қабылданған шарттар негізінде дамуда. Аталған шарттардың шеңберінде өздерінің қажеттілігі мен өзектілігін дәлелдейтін бірқатар ауқымды мәдени жоба іске асып жатыр.

Мысалы, Т.Жүргенов атындағы Қазақ ұлттық өнер академиясы білім және шығармашылық мәселелері бойынша Беларусь Мемлекеттік өнер академиясымен және Беларусь мемлекеттік мәдениет және өнер университетімен ынтымақтастық туралы шартқа қол қойды. Қазақ ұлттық хореография академиясы Беларусь мемлекеттік мәдениет және өнер университетімен және Беларусь мемлекеттік хореографиялық гимназия-колледжімен ынтымақтастық және өзара түсіністік туралы келісімге қол қойды. 

Сонымен қатар осы кездесуге дейін Беларусь Мемлекеттік музыка академиясында ұлттық домбыра күні халықаралық жобасы аясында беларусь музыканттары алғаш рет халқымыздың ұлттық музыкасын домбыра аспабында орындағанын атап өткім келеді. Домбыра күнін өткізу жайлы ой Беларусь мемлекеттік музыка академиясының ішекті, шертпелі-соқпалы аспаптар кафедрасының студенттері мен оқытушылары Тәуелсіздік алаңында үш мың домбырашы халқымыздың танымал күйлерін орындағынын көрген кезде туындады. Осы іс-шара аясында Құрманғазы атындағы Қазақ ұлттық консерваториясы мен Беларусь Мемлекеттік музыка академиясы ынтымақтастық туралы Меморандумға қол қойып, консерватория қабырғасында «музыкалық театр режиссурасы» мамандығын ашу туралы уағдаластыққа қол жеткізді. 2020/2021 оқу жылында мәдениет саласындағы білім беру мекемелерінде еліміздің 4 өкілі білім алды.

Еліміздің студенттері үшін Беларусьтің шығармашылық жоғары оқу орындарында (Беларусь мемлекеті есебінен) орын санын ұлғайту мүмкіндігін қарастыруды ұсынамын. Біз бірлескен шеберлік сыныптарын, тағылымдамаларды, мәдениет пен өнер саласында (музыкалық өнер, білім беру) тәжірибе алмасуды тепе-теңдік негізде ұйымдастыруды ұсынуға дайынбыз.

Екі тараптың елдерімізде өткізілетін іс-шараларға қатысуы өзара іс-қимылға жаңа серпін беретініне, мәдениет пен өнер саласында байланыс орнатуға және тәжірибе алмасуға ықпал ететініне сенімдімін»,-деді Ақтоты Райымқұлова.

• 15.07.2021
• 263