Қарулы Күштерде пайдаланылатын дәрілік заттардың тізбесі өзгертілуде

Қорғаныс министрлігі «Медициналық көмек көрсету кезінде Қазақстан Республикасының Қарулы Күштерінде пайдаланылатын Қазақстан Республикасында тіркелген және әскери-медициналық мекемелердің (ұйымдардың) дәрілік формулярына енгізілмеген дәрілік заттар тізбесін бекіту туралы» Қазақстан Республикасы Қорғаныс министрінің 2020 жылғы 9 қарашадағы №612 бұйрығына өзгерістер мен толықтырулар енгізу туралы» бұйрық жобасын әзірледі. Өзгерістер мен толықтырулар «Қазақстандық ұлттық дәрілік формулярын бекіту туралы» ҚР Денсаулық сақтау министрінің 2021 жылғы 18 мамырдағы № ҚР ДСМ – 41 бұйрығына сәйкес енгізіледі. Клиникалық қауіпсіздігі мен тиімділігі дәлелденген дәрілік заттардың, сондай-ақ сирек кездесетін дәрілік препараттардың жаңартылған тізбесі медициналық ұйымдардың дәрілік формулярларын әзірлеу және тегін медициналық көмектің кепілдік берілген көлемі шеңберінде, сондай-ақ міндетті әлеуметтік медициналық сақтандыру жүйесінде сатып алу тізімдерін қалыптастыру үшін міндетті негіз болып табылады. Жаңа редакцияда құжатқа «Халық денсаулығы және денсаулық сақтау жүйесі туралы» ҚР Кодексі 195-бабының 3) тармақшасына сәйкес әскери қызметшілерге медициналық көмектің қосымша көлемін көрсетуге арналған дәрілік заттардың тізімі енгізілді. Сонымен бірге, Қарулы Күштерде пайдаланылатын дәрілік заттар тізбесінен Қазақстандық ұлттық дәрілік формулярында көрсетілгендер алып тасталды. Құжаттың толық мәтінімен 2021 жылғы 22 шілдеге дейін ашық нормативтік құқықтық актілер порталында https://legalacts.egov.kz/npa/view?pageComment=2&id=9955985 сілтемесі бойынша танысуға болады.

• 22.07.2021
• 304