Қазақстан Өзбекстанның құрылыстағы баға белгілеу жүйесін жетілдіруге көмектеседі

Өзбекстан Республикасының Құрылыс министрлігі Қазақ құрылыс және сәулет ғылыми-зерттеу және жобалау институтымен («ҚазҚСҒЗИ» АҚ) баға белгілеу жүйесін жетілдіру жөніндегі тұжырымдаманы әзірлеу туралы келіссөздер жүргізуде.

Құрылыс саласындағы уәкілетті мемлекеттік органдар өкілдерінің қатысуымен кеңес 2 тамызда онлайн режимде өтті.

Кездесу барысында тараптар «ҚазҚСҒЗИ» АҚ мамандары Өзбекстан үшін «Ғимараттардың құрылыс-монтаждау жұмыстарының жеке-дара сметалық бағалары» жинағын әзірлейтіні туралы уағдаласты.

Жүйені жаңғырту шеңберінде Қазақстан мен Өзбекстандағы баға белгілеу жүйесіне салыстырмалы талдау жүргізіледі, құрылыс материалдары, қызметтері мен жабдықтары туралы ақпаратты жинау жүйесінің әдістемесі әзірленеді. Сондай-ақ BIM жіктеуішімен байланысты болатын құрылыс материалдарының жіктеуіші әзірленетін болады.

«Қазақстан құрылыстағы баға белгілеу жүйесін жаңғыртуды 2015 жылы бастады, ол бүгінгі күнге дейін жалғасуда. Қазіргі уақытта елде мемлекеттік инвестицияларды пайдалана отырып, объектілерді салу кезінде материалдар мен еңбек ресурстарының ағымдағы бағаларын пайдалана отырып, құрылыс өнімінің құнын айқындайтын ресурстық әдіс пайдаланылады.

Қазіргі уақытта объектіге бағдарланған сметалық жинақтардың құрылымын жетілдіру бойынша жұмыс жүргізілуде», - деді «ҚазҚСҒЗИ» АҚ бас директоры Бегман Кульбаев.

ҚазҚСҒЗИ басшысы қазақстандық мамандар Өзбекстандағы әріптестерімен баға белгілеу жүйесін жетілдіру саласындағы көпжылдық жұмыс барысында алынған сәтті кейстермен бөліседі деп сендірді.

«Баға белгілеу жүйесін жаңғырту – бұл ұзақ процесс, ол нормативтік базадағы өзгерістерді ғана емес, сондай-ақ мамандарды сметалық есептілікті қалыптастырудың жаңа тәсілдеріне оқытуды және тиімді бағдарламалық шешімдерді таңдауды тұспалдайды», - деп түсіндірді «ҚазҚСҒЗИ» АҚ Құрылыстағы баға белгілеу орталығы директорының орынбасары Арман Хасен.

Іс-шараның қорытындысы бойынша екі елдің салалық ұйымдарымен бірқатар кездесулер өткізу, сондай-ақ Өзбекстанның құрылыстағы баға белгілеу жүйесін жетілдіру процесін үйлестіретін бірыңғай идеологиялық орталық құру туралы шешім қабылданды.

• 10.08.2021
• 85