Талдықорғанды көркейту-көгалдандыру мәселесі талқыланды

Бүгін облыс әкімі Амандық Баталов Талдықорған қаласын көркейту жұмыстары бойынша жиын өткізді. Басқосуға облыс әкімінің орынбасарлары, Талдықорған қаласының әкімі, құрылыс, сәулет, коммуналдық шаруашылық салаларының басшылары қатысты, - деп хабарлайды Алматы облысы әкімінің баспасөз қызметі.

Жиында облыс орталығын абаттандыру ісіне қатаң сын айтылды.  Облыс басшысы қаланы аралап көргенін, ағаштардың дер кезінде суғарылмайтынын, арықтардың да уақытылы тазаланбайтынын айтты.

Дәрігерлерге арнап қойылатын ескерткіштің орнын әзірлеу мен маңайын ретке келтіру, сол сияқты жабық жүзу бассейнінің абаттандыру жұмыстарының баяу жүріп жатқанын да сынға алды. Сонымен бірге көшенің кейбір жерлеріне киоскілер қойылып, эстетикалық талапқа сай емес кейіпте тұрғаны да тілге тиек етілді.

Амандық Баталов қала мектептерінің өз аулаларына күтім жасауды естен шығармауы тиіс екенін айтты. Сол сияқты әр мектеп балаларды қабылдауға дайын болуы тиіс. Оған қоса күрделі жөндеу жасалып жатқан мектептердегі құрылыс жұмыстары кестеге сай аяқталып, мектептер оқуға сақадай-сай болуы керектігін тиісті сала басшыларына қатаң ескертті.

- Талдықорған – шағын қала. Тап-таза, жап-жасыл қала етіп ұстауға болады ғой. Талдықорғанда негізгі дейтін үлкен үш көше бар. Соның өзін әлі ретке келтіре алмай жүрсіңдер. Қаншама қажетті техника сатып әпердік, қаншама штат бердік, соның нәтижесі неге жоқ? Әркім жұмысын жанашырлықпен жасауы керек. Сонда ғана жұмыс жемісті болады. Қалада күнделікті жаяу жүрсеңдер, қай жерде не кемшілік барын көрер едіңдер. Бір ай уақыт беремін. Қыркүйекте қаланы өзім аралаймын. Соған дейін қаланың көркейту жұмыстарын сәулет, құрылыс және басқа да тиісті мекемелер бірлесіп қалпына келтіруді талап етемін, - деді А. Баталов. Өзінің бірінші орынбасары Л.Тұрлашовқа, Талдықорған қаласының әкімі Е.Жасыбаевқа, құрылыс, сәулет және коммуналдық шаруашылық салаларының басшыларына қатаң ескертулер жасап, кемшіліктерді түзеуге бір ай мерзім уақыт берді. 

• 10.08.2021
• 199