Ғарыштық бақылау қоршаған ортаның тазалығын сақтауда

Бүгінде Қазақстанның арсеналында 6 спутник бар: 2 байланыс спутнигі, 2 Жерді қашықтықтан зондтау (ЖҚЗ) спутнигі және 2 ғылыми -техникалық спутник. Алайда, ең маңыздысы, біз спутниктерге тек ие ғана емеспіз, оларды өзіміз тәуелсіз басқарамыз және отандық экономиканың дамуы үшін қолданамыз.

Мысалы, Жерді қашықтықтан зондтау серіктерін алайық. Бұл спутниктерден алынған мәліметтер төтенше жағдайлар, ауыл шаруашылығы, орман мен су ресурстарының мониторингі, қорғаныс және қауіпсіздік бағыттары бойынша экономика секторларын жедел әрі маңызды ақпаратпен қамтамасыз етіп, мемлекеттік органдардың бірқатар міндеттерін шешу үшін қолданылады. Сондай-ақ, мониторинг орманды дала өрттерін бақылау, жерді рұқсатсыз басып алуды, заңсыз үйінділерді және т.б. анықтау сияқты басқа да бағыттар бойынша жүргізіледі.

Мәселен, соңғы ақпарат бойынша, бүгінгі күнге дейін талданған ғарыштық суреттердің негізінде 318 рұқсат етілген қоқыс полигондары анықталып, 5044 рұқсат етілмеген қоқыс алаңдары табылған.

Біздің мамандардың арқасында App Store платформасында WasteView және WasteEdit қосымшалары тіркелді. Енді iOS қолданушылары, сонымен қатар Android қолданушылары мобильді құрылғыларға қосымшаларды жүктей алады және «қалдықтар картасына» назар аудара отырып, өндіріс пен тұтыну қалдықтарының орналасуын дұрыс анықтай алады. Сондай -ақ, ағымдағы жылы https://wasteopen.gharysh.kz іске қосылды, онда ғарыштық мониторинг нәтижелеріне сәйкес қалдықтар мен оның орналасуы туралы ақпарат Қазақстанның барлық азаматтарына еркін қолжетімді.

• 13.08.2021
• 326