Қазақстан мен АҚШ ұйымдары Семей сынақ полигонындағы бірлескен қызмет қорытындыларын талқылады

Курчатов қаласында ҚР Ұлттық ядролық орталығы мен АҚШ Қорғаныс министрлігінің Қауіп-қатерді азайту агенттігі мамандарының қатысуымен «Семей сынақ полигоны: полигон аумағын қауіпсіз күйге келтіру бойынша жемісті халықаралық ынтымақтастық» тақырыбында «дөңгелек үстел» өтті.

Дөңгелек үстелге қатысушылар қауіпсіздікті арттыруға, таралу қаупін азайтуға және осы салада қол жеткізілген нәтижелерге бағытталған соңғы онжылдықта іске асырылған іс-шаралар кешенін талқылады.

Семей полигонының жабылуының 30 жылдығына орай ядролық сынақтарды жүргізу инфрақұрылымы толығымен жойылғаны, жаппай қырып-жоятын қарудың таралу қаупін азайту және полигон аумағындағы ядролық қызмет қалдықтарына қол жеткізуді болдырмау жөнінде ауқымды іс-шаралар жүзеге асырылғаны атап өтілді.

Ядролық қаруды таратпау жөнінде қабылданған шаралар бір кездері қуатты кеңестік ядролық қару кешенінің бақылаусыз ыдырауы халықаралық қатынастар жүйесі үшін тудыруы мүмкін қауіпті іс жүзінде толығымен жойды.

Бұдан басқа, ССП жабылғаннан кейін бұрынғы КСРО әскери-өнеркәсіптік кешенін конверсиялау жүргізілді. Нәтижесінде бүгінгі таңда ҚР Ұлттық ядролық орталығының Қазақстандағы ең ірі және дамыған эксперименттік базасы бар. Қазіргі уақытта базада жұмыс істеп тұрған екі зерттеу реакторы, атом энергетикасының қауіпсіздігі саласында зерттеулер жүргізу үшін жаңадан құрылған стендтер, КТМ токамагы, ИСК қоймасы, ғылыми зертханалар мен кешендердің кең спектрі бар.

Осы базаны пайдалана отырып бүгінде атом энергетикасы, радиациялық материалтану, радиоэкология және ғылымның басқа да салаларында, оның ішінде халықаралық жобалар шеңберінде озық зерттеулер жүргізілуде.

Қорытындылай келе, қатысушылар жүргізілген жұмыстың зор ауқымы мен маңыздылығын, нәтижесінде ССП-ның көптеген проблемаларын шешуге және әлемді қауіпсіз етуге мүмкіндік жасалғандығы туралы атап көрсетті.

• 29.08.2021
• 262