Ардагерлер қолдау танытты

Талдықорғандағы Тіл сарайында облыс әкімі Амандық Баталовтың қатысуымен ардагерлер кеңесінің VIII есеп беру конференциясы өтті. Карантин талаптарына байланысты аудандар онлайн-режимде қатысты. Конференция басталмас бұрын делегация өкілдеріне мекеме жұмысы туралы бейнебаян көрсетілді.

Кездесуді облыстық ардагерлер кеңесінің төрағасы Ермек Келемсейіт ашып, жүргізіп отырды. Оның айтуынша, 2016 жылы облыста 628 ардагер ұяшығы болса, биылғы жылы оның саны 922-ге дейін өсті. Ұйымға мүше азаматтардың жалпы саны 240 мыңға жетті. Бес жыл ішінде жастармен кездесуден бастап, кітап шығару сынды қомақты жұмыс атқарылды. Облыстық ардагерлер ұйымының жұмысы конференцияға қатысушылар тарапынан оң бағасын алды. Жарыссөзге шығушылар ұйымның маңыздылығы мен оның қоғамның өзекті мәселесін дер кезінде шешуге қатысты маңыздылығына тоқталды.

Өз кезегінде облыс әкімі Амандық Баталов ардагерлер ұйымына өз алғысын жеткізді. Ол іс-шара ел тәуелсіздігінің 30 жылдығы аясында өткізіліп отырғандығын атап өтті. Сонымен қоса Талдықорған қаласының қайтадан облыс орталығы болғанына 20 жыл толғаны да айтылды.

- Еліміздің қалыптасу жолында ардагерлеріміз көп атсалысты. Ардагердің әрқайсысы еліміздің, облыстық дамуының оң динамикасына өз үлестерін қосты. Біз, өз кезегімізде, әрқайсыңыздың еңбегіңізді бағалаймыз. Сондай-ақ жастарға патриоттық тәрбие берудегі және аймақтың саяси-әлеуметтік өміріне де үлес қосып келесіздер, - деп атап өтті облыс әкімі.

Амандық Баталов аталған мерзім ішінде облыстың әлеуметтік-экономикалық бағытта дамуы туралы қысқаша баяндады. Одан бөлек, аймақ басшысы жеткен жетістік - облыс тұрғындарының еңбегі екенін, оның ішінде ардагерлер ұйымының жұмысын атап өтті.

Конференция соңында қатысушылар бірнеше ұйымдастырушылық сұрақтарға тоқталды. Соның негізінде қоғамдық бірлестіктердің алдағы уақыттағы жұмысы да жоспарланды. Сол күні республикалық ардагерлер ұйымының съезіне қатысатын делегаттар тізімі де талқыланып, бекітілді.
Алматы облысы әкімінің баспасөз қызметі

• 20.09.2021
• 209