Облыс әкімі Жәнібек ауданындағы ЖҚЖК бойынша нысандарды тексерді

Жұмыс сапары барысында БҚО әкімі Ғали Есқалиев Жәнібек ауданында "Жұмыспен қамтудың жол картасы" мемлекеттік бағдарламасы бойынша жүзеге асырылып жатқан барлық жобаларды тексерді. Сондай-ақ, аймақ басшысы шаруа қожалықтарын аралап, жолдар мен басқа да құрылыс нысандарындағы жұмыстарды тексеріп шықты.
"ЖҚЖК" мемлекеттік бағдарламасы бойынша ауданда бес жоба жүзеге асырылуда. Бұл А.Оразбаева атындағы ЖОББМ спорт залының құрылысы Жәнібек ауылындағы Абай көшесіндегі автожол құрылысы, Ғ. Абдуллин атындағы ЖОББМ, Талов ауылындағы мәдениет үйін, Жақсыбай ауылындағы М. Ықсанов атындағы ЖОББМ-бақшасын күрделі жөндеу құрылыс жұмыстары болып отыр.
Барлық жұмыстарға 687 млн теңге бөлініп, 200-ге жуық жұмыс орны құрылды. Олардың жартысы жұмыспен қамту орталығы арқылы тартылды.
Аудан орталығында облыс әкімі жаңадан пайдалануға берілген сквермен танысты. Жөндеу жұмыстарының құны 45,87 млн теңгені құрады. Ауыл тұрғындарының қуанышына айналған жайлы алаңды бірнеше ай ішінде жасап, қолданысқа енгізді. Сондай-ақ, Жәнібек ауылында өңір басшысы дене шынықтыру-сауықтыру кешенінің құрылысын тексерді.
Аймақ басшысы Жәнібек-Талов-Кіші өзен автомобиль жолының 2-ден 27 км-ге дейінгі учаскесін орташа жөндеуден өткізу жұмыстарын тексерді. Жөндеу жұмыстарының құны 1,37 млрд теңгені құрап отыр. Жобаның мердігері "Компания Құрылыс көмек" ЖШС. Жоба аясында 15 тұрақты жұмыс орны құрылды. Нысан келесі жылдың қазан айында тапсырылады деп жоспарлануда.
Борсы ауылында Ғали Есқалиев "Тыныштық" шаруа қожалығымен танысты. Мұнда 200 бас ІҚМ, 100-ден астам жылқы және 270-тен астам ҰҚМ үшін қысқы жем дайындау бойынша үлкен жұмыстар жүргізілуде. Ал Талов ауылында "Құбаш" шаруа қожалығының егіс жұмыстарымен танысты. Шаруа қожалығының тұқымдарының егіс алаңы 180 га құрап отыр.

• 05.08.2020
• 374