БҚО әкімі Ғали Есқалиев жұмыс сапарымен Шыңғырлау ауданында болды

Өңір басшысы «Жұмыспен қамтудың жол картасы» бағдарламасы бойынша әлеуметтік бағыттағы жобалардың іске асырылу барысымен, мемлекеттік–жекеменшік серіктестік аясында салынған дәрігерлік амбулаторияның жұмысымен және дене шынықтыру-сауықтыру кешенінің құрылысымен танысты. Ауданда жүргізіліп жатқан жұмыстарды тексеру барысында облыс әкімі «Жұмыспен қамтудың жол картасы» мемлекеттік бағдарламасы аясында жүзеге асырылып жатқан жобаларға ерекше назар аударды. Атап айтқанда, Ақшат ауылында өңір басшысы Мұхамбетов көшесі бойындағы ұзындығы 3 км-ден астам автожолды және 1971 жылы салынған А. Тихоненко атындағы мектептің күрделі жөндеу барысымен танысты. Мектепте қазіргі таңда 240-тан астам оқушы оқиды. Мектеп оқу жылы басталғанға дейін пайдалануға беріледі. Ақшат ауылында облыс әкімі мемлекеттік–жекеменшік серіктестік аясында салынған дәрігерлік амбулаторияға барды. Тартылған инвестиция көлемі 119 млн. теңгені құрады. Денсаулық сақтау нысанында 10 орындық күндізгі стационар бар және күніне 17 адамды қабылдайды. 2 дәрігер және 6 орта медициналық қызметкер жұмыс істейді. Шыңғырлау ауылында ЖҚЖК бойынша «Дән» мәдениет үйі мен Тасмағамбетовтың көшесі автожолына күрделі жөндеу жұмыстары жүргізілуде. Нысандарды осы жылдың қараша айында іске қосу жоспарлануда. Жалпы, ЖҚЖК бағдарламасы бойынша ауданда бюджеттен қарастырылған 2,18 млрд. теңгеге әлеуметтік инфрақұрылымның 7 жобасы іске асырылуда. Нысандарда 287 адам еңбек етеді, соның ішінде 170-і халықты жұмыспен қамту орталығы арқылы жұмысқа тартылды. Аудан орталығында облыс әкімі дене шынықтыру-сауықтыру кешенінің құрылысын тексерді. КПО б.в. қаражаты есебінен салынып жатқан ДШСК 2021 жылдың басында тапсыруды жоспарлап отыр.

• 10.08.2020
• 418