Мемлекеттік хатшы Талғар ауданында болды

Мемлекеттік хатшы Қырымбек Көшербаевтың Алматы облысына жұмыс сапары Талғар ауданында жалғасты. Мұнда ол Жаңалықтағы Саяси қуғын-сүргін құрбандарына арналған ескерткішке гүл шоқтарын қойып, жергілікті музейді аралады. Осы сапарда Мәдениет және спорт министрі Ақтоты Райымқұлова, Ақпарат және қоғамдық даму министрі Аида Балаева, Парламент Мәжілісінің депутаты Айдос Сарым да болды.

Музейдің жұмысы және экспозициялар жайлы қонақтарға Саяси қуғын-сүргін құрбандары музейінің меңгерушісі Мейіржан Мұсабаев баяндап берді.

Мұнан соң музейдің мәжіліс залында саяси қуғын-сүргін құрбандарын толық ақтау жөніндегі облыстық комиссияның жұмыс тобының жетекшілерімен кездесу өткізіліп, әңгіме барысында ғылыми экспедициялық және іздестіру жұмыстарының барысында өңірде атқарылған істер жайлы айтылды.

Қ.Көшербаев репрессия құрбандарын толық ақтау ел Президенті Қасым-Жомарт Тоқаевтың бастамасымен құрылған мемлекеттік комиссияның негізгі міндеттерінің бірі екенін атап өтті. Бұл жұмыс тарих пен мұрағаттық деректерді зерттеу негізінде жүргізіледі.

Мәселен, өңірде бүгінде 7 жұмыс тобы құрылып, жұмыс істеуде. Олардың қарауында мың жарымға жуық мұрағат материалдары бар. Соның нәтижесінде ақтауға жататын 2326 адамның мәліметтері зерттелген.

Атап өтсек, Саяси қуғын-сүргін құрбандарының музейі Жаңалық ауылында 2018 жылы салынды. Мұндағы экспозициялар үш залда – «Қазақстандағы 1916 жылдан 1986 жылдарға дейінгі репрессия тарихы», «Саяси репрессия құрбандарын еске алу», «Әділет» тарихи-ағартушылық қоғамы және оның қызметі» туралы залдарда ұсынылған.

• 06.10.2021
• 225