Қазақстандағы Ресей Федерациясыгның Мәдениет күндері аясында Гала-концерт өтті

Нұр-Сұлтан қаласындағы «Қазақстан» Орталық концерт залында Қазақстан Республикасындағы Ресейдің Мәдениет күндері аясында Қазақ мемлекеттік симфониялық оркестрімен бірге ресейлік жетекші орындаушылардың қатысуымен Гала-концерт өтті.

Аталған іс-шараға Мәдениет және спорт министрі Ақтоты Райымқұлова, Ресей Федерациясы Мәдениет министрінің орынбасары Ольга Ярилова, Қазақстан Республикасындағы Ресей Федерациясының Төтенше және Өкілетті Елшісі Алексей Бородавкин, Мәдениет және спорт вице-министрі Нұрғиса Дәуешов, МСМ Мәдениет комитетінің төрағасы Ақан Абдуәлиев, МСМ Архив істері және құжаттаманы басқару комитетінің төрағасы Қуат Бораш қатысты.

Гала-концертте сөз алған Ақтоты Райымқұлова Мәдениет күндерінің басталуымен құттықтап, екі мемлекет арасындағы мәдени байланыстар барлық бағытта дәйекті түрде дамып келе жатқанын айтты.

«Қазақстандағы Ресей Мәдениеті күндері аясында Қазақ мемлекеттік симфониялық оркестрінің қатысуымен жетекші ресейлік орындаушылардың өнер көрсетуі биыл елімізде жарқын оқиғалардың бірі болары анық. Бүгінгі күні, мәдениет пен руханият екі ел арасындағы достықтың артуының тұғыры іспеттес болып отыр. Мәдени байланыстар бүгінгі достастығымыздың басты ынталандырушы күші. Мәдени байланыстардың дамуының тарихи процесінде, олардың пайда болуынан бастап дамыған заманауи формаларға дейін, сөзсіз үлкен өзара әсер етеді»,- деді Мәдениет және спорт министрі.

Өз кезегінде Ольга Ярилова осы аптада өтетін іс-шаралар екі ел арасындағы қарым-қатынасты, әсіресе мәдениет саласындағы дипломатиялық ынтымақтастықты нығайтуға септігін тигізетінін айтты. Сонымен қатар екі мемлекет арасындағы мәдени байланысты дамыту мен нығайту жолында бірлесіп іс-шаралар өткізуге дайын екендігін жеткізіп, жиналған қонақтармен өнерпаздарға шығармашылық табыс тіледі.

Гала-концерттің дирижері – Солтүстік Осетия Республикасының Еңбек сіңірген әртісі Заурбек Гугкаев болды. Іс-шарада Анна Аглатова (сопрано), Владислав Куприянов (баритон), Владимир Магомадов (контратенор), Константин Емельянов (фортепиано), Александр Рамм (виолончель), Гайк Казазян (скрипка), Анастасия Тюрина (балалайка), ал елімізден «Астана Опера» Мемлекеттік опера және балет театрының жетекші солистері – Қазақстанның еңбек сіңірген қайраткері Медет Чотабаев (тенор) пен халықаралық байқаулардың лауреаты Татьяна Вицинская (меццо-сопрано) өнер көрсетті.

Гала-концертте көрермендер назарына орыс композиторларының операларынан белгілі ариялар, романстар мен заманауи авторлардың шығармалары ұсынылды.

• 13.10.2021
• 218