Қазақ өнер әлемі «Қанаттылар» атты тағы бір театрмен толықты

Елордадағы «Жастар» театры жанынан құрылған «Қанаттылар» инклюзивті театрының ашылуы өтті. Өнер ұжымы алғашқы маусымашарды ақын Гүлнар Салықбайдың «Қанаттылар» музыкалық-поэтикалық қойылымымен бастады. Қойылымның режиссері – Нұрфат Вахитов. Ал театр жетекшісі – Арнұр Ысқақов.

Салтанатты іс-шараға Мәдениет және спорт министрі Ақтоты Райымқұлова, Нұр-Сұлтан қаласының әкімі Алтай Көлгінов, «Қазақконцерт» мемлекеттік концерт ұйымының директоры Жеңіс Сейдуллаұлы, қала тұрғындары мен қонақтары қатысты.

Мәдениет және спорт министрі биыл қазақ өнері тағы бір театрмен толыққанын, «Қанаттылар» инклюзивті театры дене мүмкіндігі шектеулі жандарға тамаша шығармашылық мүмкіндік пен қолайлы орта сыйлағанын атап өтті.

«Жыл сайын елімізде қазан айының екінші жексенбісінде ерекше күтімді қажет ететін жандар күні атап өтіледі. Qanattylar театрының тұсаукесері осынау атаулы күнмен қатар келіп тұр. Президент Қасым-Жомарт Тоқаев инклюзивті білім беру саласына қолайлы орта қалыптастыруға, мүмкіндігі шектеулі жандарға инфрақұрылымның қол жетімділігін арттыруға ерекше назар аударады. Қазір бұл салада көптеген жұмыс атқарылып жатыр. Мəселен, қазір елордада ерекше қажеттілігі бар адамдармен жұмыс істейтін үкіметтік емес ұйымдар мен дене күтімін қажет ететін мәдениет ұйымдарының қызметкерлері арасында Ónerpaz bolsań… атты фестивальдің жеңімпаздары анықталуда. Келер аптада байқау өз мәресіне жетіп, марапаттау рәсімі өтеді»,-деді.

Сондай-ақ Ақтоты Райымқұлова сөз соңында «Қанаттылар» театры мазмұнды қойылымдармен көп күттірмей өз көрермендерін қалыптастыратынына, алдағы уақытта түрлі жанрдағы қойылыммен көпшіліктің жан дүниесін байыта беруіне тілектестік білдірді.

Айта кетейік, биыл қаңтар айында құрылған өнер ұжымы «Қанаттылар» музыкалық-поэтикалық қойылымын үш күн бойы, 17 қазанға дейін сахналайды. Жалпы театрда дене мүмкіндігі шектеулі 20-ға жуық артист жұмыс істейді.

• 18.10.2021
• 414