ҰҚШҰ Жедел ден қою ұжымдық күштерінің бірлескен оқу-жаттығуы басталды

Тәжікстанның «Харбмайдон» полигонында Ұжымдық қауіпсіздік туралы шарт ұйымының Ұжымдық жедел ден қою күштері арасында «Өзара іс-қимыл-2021» оқу-жаттығуы басталды.

Құрамына десанттық-шабуылдау, мотоатқыштар, артиллерия бөлімшелері мен арнайы мақсаттағы топтар кіретін қатысушылар Орталық Азия өңірінде шекара маңындағы қарулы қақтығысты оқшаулау жөнінде бірлескен операция жүргізеді.

Бірінші кезең барысында әскери қызметшілер бірлескен операцияны ұйымдастыру, ҰҚШҰ ҰЖДК бөлімшелерін міндеттерді орындауға дайындау және бөлімшелерді үйлестіру мәселелерін пысықтайды. Екінші кезеңде мемлекеттік шекараны бақылауды қамтамасыз ете отырып, заңсыз қаруланған құрылымдардың жауынгерлік топтары мен жасақтарын ауыздықтауды және оларды жоюды жүзеге асыру қажет.

«Өзара іс-қимыл-2021» бірлескен оқу-жаттығуы «Жауынгерлік бауырластық-2021» жедел-стратегиялық оқу-жаттығуы шеңберінде өтеді. ҰҚШҰ-ның Жедел ден қою ұжымдық күштері ұйымға мүше мемлекеттердің қауіпсіздігіне төнетін сын-қатерлерге уақтылы ден қоюға арналған.

• 19.10.2021
• 34