Ақтоты Райымқұлова Оксана Тенге Мемлекет басшысының құттықтау хатын табыстады

Мемлекет басшысы Қасым-Жомарт Тоқаев 28-31 қазан аралығында Нұр-Сұлтан қаласындағы «Барыс-Аренада» өткен Denis Ten Memorial Challenge халықаралық турниріне қатысушыларды құттықтады. Бүгін Мәдениет және спорт министрі Ақтоты Райымқұлова Президенттің құттықтау хатын турнирді ұйымдастырушы «Денис Тен қоры» қоғамдық қорының президенті Оксана Тенге табыстады.

«Құрметті мәнерлеп сырғанаушылар мен жанкүйерлер!

Біз Сіздермен құйрықты жұлдыздай жарқ етіп өте шыққан танымал қазақстандық мәнерлеп сырғанаушы Денис Тенді еске алуға арналған екінші халықаралық турнирді қорытындылап тұрмыз. Мәнерлеп сырғанаудан Қазақстан қоржынынан алғашқы Олимпиада жүлдесін салған, сондай-ақ көптеген байрақты бәсекеде жүлдегер болған Денис Теннің есімі ел спорты тарихында алтын әріппен жазылды.

Денис қатарластары мен өзінен кейінгі спортшыларға үлгі көрсетіп, жол сілтеді. Үздіксіз жаттығу мен ерен еңбектің арқасында толағай табысқа қол жеткізуге болатынын жарқын өнерімен паш етті.

Бұл турнир алыс-жақын шет елдердегі жас және танымал мәнерлеп сырғанаушылардың басын қосып, шеберлігін шыңдайтын алаңға айналып келеді. Сонымен қатар мұндай сайыс жастардың қызығушылығын арттырып, бұқаралық спорттың дамуына серпін береді.

Биыл Denis Ten Memorial Challenge Халықаралық конькишілер одағының «Челленджер» санатында жарыстар қатарына қосылып отыр. Мұның өзі аталған турнирдің аясын кеңейтіп, ауқымын арттыратыны анық. Осы орайда Халықаралық конькишілер одағына шынайы ризашылығымды білдіремін»,-деп жазылған Мемлекет басшысының хатында.

• 02.11.2021
• 248