Мәдениет саласындағы ҮЕҰ шығармашылық одақтармен онлайн кездесу өтті

Ақтоты Райымқұлова Қазақстан Республикасы Тәуелсіздігінің 30 жылдық мерекесіне орай ұйымдастырылған 10-шы Қазақстанның Азаматтық форумы аясында мәдениет саласындағы ҮЕҰ шығармашылық одақтармен онлайн кездесу өткізді. Кездесу ZOOM платформасы арқылы көрсетілді.

Жиын барысында қоғам мен мемлекеттің тұрақты дамуы негізінде серіктестіктің бірлескен жетістіктері туралы және алдағы уақытқа қойылған мақсаттар жайлы ұтымды ойлар мен бірқатар ұсыныстар айтылды.

Ақтоты Райымқұлова форумға қатысушыларды Тұғырлы Тәуелсіздігіміздің 30 жылдығымен құттықтай отырып, мемлекеттің үкіметтік емес ұйымдармен өзара іс-қимылына қызығушылығы үшін алғысын айтты. Үкіметтік емес сектор әлеуметтік мәселелерді шешуде және азаматтық бастамаларды жандандыруда мемлекеттің сенімді серіктесі екенін жеткізді.

«Елімізде мәдениет пен өнер саласында 8 мыңнан астам адамды қамтып отырған 16 шығармашылық одақ, оның ішінде жазушылардың, дизайнерлердің, композиторлардың, музыканттардың, хореографтардың, театр қайраткерлерінің, кинематографистердің, сәулетшілердің, эстрада артистерінің, қолөнершілердің, суретшілердің және басқа да үкіметтік емес қоғамдық бірлестіктері құрылып, жұмыс істеуде.

Шығармашылық одақтарды мемлекеттік қолдау елдегі әлеуметтік саясатты жүргізуде қатынастардың жаңа моделін қалыптастыруға серпін береді. Уәкілетті органның шығармашылық үкіметтік емес ұйымдармен өзара іс-қимыл және ынтымақтастық жүйесі жетілдіріліп, үкіметтік емес ұйымдар ретінде мемлекеттің көптеген әлеуметтік міндеттерін шешуде әріптес болады»,- деді Мәдениет және спорт министрі.

Сонымен қатар Ақтоты Райымқұлова министрлік соңғы үш жылда шығармашылық одақтармен және қауымдастықтармен бірлесіп 25-тен астам мәдениет саласын ілгерілетуге бағытталған іс-шаралар өткізгенін айтты.

«Қазақстан Сәулетшілер одағының ұйымдастыруымен 2018 жылғы Халықаралық сәулетшілер Конгресі өтті.
«Рухани жаңғыру» бағдарламасының «Жаһандық әлемдегі заманауи мәдениет» арнайы жобасы аясында «Әдебиет пен өнер туындыларын аудару және іріктеу сапасын бақылау қызметтері» жобасы іске асырылды. Аталған жобаны жүзеге асыруға «Ұлттық аударма бюросы» қоғамдық бірлестігі, Жазушылар одағы және Қазақстан Суретшілер одағы белсенді тартылды. Жоба қорытындысы бойынша 2019 жылы «Қазіргі қазақ поэзиясының және прозасының антологиялары» 6 тілде басып шығарылды.
Қазақстан Жазушылар одағы «Қазіргі әлемдегі сөз энергиясы» атты Еуразиялық әдеби форум ұйымдастырып, аталған іс-шараға Еуразия құрлығынан 27 жазушы, аймақтардан 54 делегат және 150-ге жуық жазушы қатысты.
Қазақстан театрлары қауымдастығымен бірлесіп, шетелдік театр өнерінің шеберлерінің қатысуымен Алматыда Қазақстанның театр қайраткерлерінің республикалық ірі практикумы өтті.

Сол секілді Алматы қаласында «Сахнагер» ұлттық театр сыйлығының ІІ Форум-фестивалі, ІІ Халықаралық «Бауыржан Fest» әзіл фестивалі, Темірбек Жүргеновтің 120 жылдығына және Астананың 20 жылдығына арналған Орталық Азия елдерінің VII Халықаралық фестивалдері ұйымдастырылды.
Министрлік тарапынан «Activ Life» мүгедектер қоғамдық бірлестігімен бірлесе «Wide World» - «Ұлы Дүние» І Халықаралық ерекше театрлар фестивалі өтті»,- деді Ақтоты Райымқұлова.

Қазақстан Республикасы Президенті Қ.К. Тоқаевтың шығармашылық одақтарды қолдаудың жүйелі шараларын қабылдауға қатысты тапсырмасына (2019 жылғы 9 сәуірдегі № 19-32-17.145) сәйкес мемлекеттік әлеуметтік тапсырыс аясында мәдениет саласындағы шығармашылық одақтарды қолдау қарастырылды.

2021 жылдың соңына дейін мәдениет, өнер және ғылым қайраткерлеріне, соның ішінде жыл сайынғы мемлекеттік әлеуметтік тапсырыс аясында қолдау көрсету жоспарланған.

Бүгінгі күні мәдениет, өнер қайраткерлерін қолдау мақсатында Қазақстан Республикасының Тұңғыш Президенті-Елбасының мәдениет және өнер саласындағы мемлекеттік стипендиясы тағайындалады, мәдениет және өнер қайраткерлерін мемлекеттік және ведомствалық наградалармен марапатталады.

Сондай-ақ жиын барысында айтылған ұсыныстар мен қойылған сауалдар министр тарапынан тыңдалып, алдығы уақытқа бірқатар жоспар жасалды.

• 18.11.2021
• 295