халық санағының ұйымдастырылу қорытындысы мен желтоқсан айындағы мерекелерді ұйымдастыру және өткізу туралы мәселелер

Менің төрағалығымен өткен аппараттық кеңесте халық санағының ұйымдастырылу қорытындысы мен желтоқсан айындағы мерекелерді ұйымдастыру және өткізу туралы мәселелер қаралды.

Алғашқы мәселе бойынша облыстық статистика департаментінің басшысы Ерназар Құлтаев баяндама жасады. Оның айтуынша,  1 қыркүйек пен 30 қазан аралығында халық санағының негізгі кезеңі өткізіліп, ол өз кезегінде Интернет-сауалнама және жаппай сауалнамаға бөлінген. Интернет-сауалнама 1 қыркүйектен басталып 15 қазанда аяқталуы тиіс болған, бірақ тұрғындарды толықтай қамту және респонденттерге ыңғайлы болуы үшін 8 қарашаға дейін ұзартылған.

Жалпы халық санағын ұйымдастыру, өткізу барысында облыстағы жоғары оқу орындарында және колледждерде білімалып жатқан  Түркменстан, Өзбекстан, Тәжікстан, Ресей және Қытайдан келген студенттерде санақтан өткізілді. Облыста барлығы 1100-ге жуық шетелдік студент санаққа тіркелді. Санақтың алдын ала деректері бойынша 30 қазанға Жамбыл облысы халқының саны 1,2 миллионнан астам адамды құрады.

Аталған департамент басшысы санақтың алғашқы қорытындысы желтоқсан айында, жалпы қорытынды алдағы жылы жарияланатынын жеткізді.  

Бұдан кейін жиында желтоқсан айында ұйымдастырылатын іс-шара жоспары сараланды.

• 30.11.2021
• 357