Әскери қызметшілерді зейнетақымен қамсыздандыру үдерісі автоматтандырылды

Қорғаныс министрлігінің Зейнетақымен қамсыздандыру орталығы Қазақстанның күштік құрылымдары арасында бірінші болып әскери қызметшілерді зейнетақымен қамсыздандыру үдерісін автоматтандырды.

«Зейнетақы аударымдары» арнайы бағдарламасы Еңбек және халықты әлеуметтік қорғау министрлігінің ақпараттық жүйесімен Қарулы Күштерде және әскери прокуратура органдарында әскери қызмет өткерген әскери қызметшілерге еңбек сіңірген жылдарына зейнетақы төлемдерін тағайындау бөлігінде интеграцияланған. Зейнеткердің тұрғылықты жері бойынша «Азаматтарға арналған үкіметтің» аумақтық филиалдарына зейнетақы төлеуге берілетін үзінділер мен хабарламалар электронды нұсқада жіберіледі.

Бағдарламаға 20 мыңнан астам адамды құрайтын зейнеткерлердің дербес деректер базасы көшірілді. Қазіргі уақытта зейнетақымен қамсыздандыру орталығы мәліметтерді салыстыру және өзектендіру жөнінде ауқымды жұмыс жүргізіп жатыр.

Әскери қызметшілердің еңбек сіңірген жылдарын алдын ала және түпкілікті есептеп, зейнетақы төлемдерін тағайындау, қайта есептеу жолдары автоматтандырылды.

Бұдан өзге,  «Өтініштер тізілімі» модулі түрлендірілді, ол арқылы жергілікті әскери басқару органдары біржолғы төлемдер мен жәрдемақылар тағайындау жөніндегі құжаттарды әскери зейнеткерлер мен олардың отбасы мүшелеріне бере алады. Елдің басқа өңірлеріне көшуіне байланысты төлемдерді тоқтата тұру (қайта бастау), дербес деректердің өзгеруі, еңбек өтілінің өзгеруіне байланысты қайта есептеу, елден тыс тұрақты тұрғылықты жерге көшуіне байланысты зейнетақы төлемдерінің тоқтатылуы және басқа да себептерге байланысты процестер автоматтандырылған. Нәтижесінде төлемдерді тағайындау және алу мерзімін бір айдан бір аптаға дейін қысқартуға мүмкіндік берді.

Осы үдерісті автоматтандырудың арқасында зейнеткерлер мен олардың отбасы мүшелері 10-15 минут ішінде қажетті анықтамаларды ала алады. Бұрын бір зейнетақыға қатысты іс кем дегенде бір сағатқа созылатын.

Азаматтарға ыңғайлы болу үшін Қорғаныс министрлігінің Зейнетақымен қамсыздандыру орталығы биыл желтоқсан айында төлемдерді тағайындау туралы sms-хабарлама таратуды іске қосты.

Деректерді цифрлау және зейнетақы тағайындау мен төлемді автоматтандыру жөніндегі жұмыс «Цифрлық Қазақстан» мемлекеттік бағдарламасы аясында жүргізілуде.

• 23.12.2021
• 418