Генералдар мен офицерлер, сержанттар мен сарбаздар, Қазақстан Республикасы Қарулы Күштерінің қызметкерлері!

Құрметті ардагерлер!

Осы жыл Қарулы Күштер үшін күрделі жыл болды. Осыған қарамастан, біз барлық қиындықты жеңіп, алдымызға қойылған міндетті орындадық. Кәсіби шеберлікті арттыру, жауынгерлік әлеуетті нығайту, Қарулы Күштерді жетілдіру бойынша  жұмыс жалғасуда.

Әскерлерді қару-жарақ пен әскери техниканың қазіргі заманғы үлгілерімен жарақтандыру жалғастырылды.

Әскери қызметшілер мен олардың отбасының әлеуметтік қорғалуын жақсарту үшін ауқымды жұмыс атқарылды.

Ел Президенті – Қарулы Күштердің Жоғарғы Бас қолбасшысы Қасым-Жомарт Кемелұлы Тоқаев әскерді одан әрі дамытуға негіз болатын стратегиялық және бағдарламалық құжаттарды бекітті. «Қауіпсіз ел» ұлттық жобасы бекітілді. Оның орындалуы қару-жарақ пен оқ-дәрілерді сақтау қауіпсіздігін, қару-жарақтың тәжірибелік үлгілерін шығаруды және әскери объектілерді жетілдіруді қамтамасыз етеді.

Мемлекет басшысының Қазақстан халқына Жолдауында айтылған Әскери доктринаны қайта қарау және мерзімді қызметтегі әскери қызметшілерді сұранысқа ие мамандыққа үйрету жөніндегі тапсырмасы іске асырылуда.

Қарулы Күштер әскерлерді даярлаудың барлық жоспарланған, оның ішінде халықаралық іс-шараларды өткізді. Оқу-жаттығуларға Қарулы Күштердің құрамалары мен әскери бөлімдерімен қатар ұлттық қауіпсіздік, ішкі істер органдары, төтенше жағдайлар министрлігінің бөлімшелері де қатысты.

Жауынгерлік даярлық Қарулы Күштердің Жоғарғы Бас қолбасшысының қатысуымен өткен «Отпантау – 2021» командалық-штабтық стратегиялық оқу-жаттығуы және стратегиялық командалық-штабтық әскери оқу-жаттығуымен аяқталды.

Қазақстандық бітімгерлер Ливандағы, әскери бақылаушылар Батыс Сахарадағы миссияға қатысуды жалғастыруда. Алғаш рет бітімгершілік миссияға екінші деңгейдегі госпитальдың әскери-медициналық персоналы дайындалуда.

Жастарды әскери-патриоттық тәрбиелеу жаңа серпін алды. Басқа да мемлекеттік және жергілікті атқарушы органдармен бірлесіп «Біртұтас ұлт – біртұтас әскер» бағдарламасы әзірленді. Үш жыл ішінде «Жас сарбаз» республикалық балалар-жасөспірімдер әскери-патриоттық қозғалысы 236 мыңнан астам баланы қамтыды. Биылғы жылы «Айбын» жастар жиыны жетінші рет өткізілді.

2022 жыл біз үшін ерекше жыл, өйткені Қарулы Күштердің құрылғанына 30 жыл толады. Армия жауынгерлік сайыстың жаңа кезеңін «Қарулы Күштердің 30 жылдығына – біздің ерен еңбегіміз!» ұранымен өткізеді.

Қарулы Күштерді нығайту және оны одан әрі дамыту, еліміздің қорғаныс қабілетін арттыру мүддесіне қызмет ету – бұл әр әскери қызметшінің қасиетті борышы.

Сіздердің әскери борышқа адалдығыңыздың, ерен еңбегіңіздің арқасында азаматтардың қауіпсіздігі қамтамасыз етіледі. Жаңа жыл мерекесінде жауынгерлік күзет шебінде тұрған әскери қызметшілерге  ерекше алғыс білдіремін.

Құрметті достар!

 Сіздерді келе жатқан Жаңа жылмен құттықтаймын! Жаңа жыл жақсылыққа толы, берекелі жыл болсын!

Сіздерге зор денсаулық, отбасы амандығын тілеймін!

• 31.12.2021
• 284