Парламент Сенатында Қазақстан мен Ресейдің әскери ынтымақтастығы туралы шарт қаралды

Қазақстан Парламенті Сенатының жалпы отырысында Қазақстан Республикасы мен Ресей Федерациясы арасындағы әскери ынтымақтастық туралы мемлекетаралық шартты ратификациялауды көздейтін заң жобасы қаралды.

Құжатқа 1994 жылғы 28 наурыздағы Қазақстан Республикасы мен Ресей Федерациясы арасындағы Шарттың орнына екі мемлекет арасындағы әскери ынтымақтастықты өзектендіру және одан ары дамыту мақсатында 2020 жылғы 16 қазанда қол қойылды. 1994 жылғы Шарт қазіргі заман талабымен қарасақ, ескірген, сондай-ақ толық орындалды деуге болады.

– Шартты ратификациялау мемлекеттердің қауіпсіздігін қамтамасыз ету мүдделерінде әскерлерді пайдалануды бірлесіп жоспарлауға, аймақтық қауіпсіздікке төнетін қауіптер мен сын-қатерлерге бірлесіп қарсы тұруға, халықаралық ұйымдар шеңберіндегі өзара іс-қимыл, мәдениет, спорт, сондай-ақ, әскери ынтымақтастықтың өзге де бағыттарын іске асыруға мүмкіндік береді, – деді қорғаныс министрінің орынбасары генерал-лейтенант Сұлтан Қамалетдинов.

Құжатты қабылдау екі мемлекеттің қорғаныс қабілетін нығайтуға бағытталған бірлескен жұмысқа қосымша серпін беріп, заманауи сын-қатерлер мен қауіптерге қарсы тұруда үйлескен іс-қимылдарды ұйымдастыруға ықпал етеді.

• 17.02.2022
• 183