Шу ауданына жұмыс сапары

Мемлекет басшысының тапсырмасына сәйкес Шу ауданындағы жұмыс сапарымның барысында Алға ауылдық округіндегі есептік жиынға қатысып, жергілікті тұрғындармен кездестім.

Округ әкімінің өткен жылы атқарған жұмыстары туралы есебін тыңдап, тұрғындардың өтініштеріне назар аудардым. Анықталған мәселелер бойынша жауапты тұлғаларға нақты тапсырмалар жүктедім.

Шу электрмен жабдықтау, Шу сигнализация және байланыс дистанциялары және Шу локомотив пайдалану депосының басшыларының да есебін тыңдап, кәсіпорын жұмысшыларымен кездесу өткіздім.

Аудандағы әлеуметтік нысандардың қызметімен, құрылыс-жөндеу жұмыстарымен таныстым.

Сондай-ақ, Қордай ауданындағы Отар ауылдық округінің тұрғындарымен кездестім. Округ әкімінің есебін тыңдап, алда атқарылуы тиіс жұмыстарға көңіл бөлдік.

Гвардейский кентіндегі вакцина шығаратын биофармацевтикалық зауыттың маңындағы BSL-3 лабораториясының құрылысын көрдім. Нысан құрылысы ағымдағы жылдың наурыз айында аяқталмақ.

Қордайдағы тұрғын үйлер, мектеп, мәдениет үйі, спорт кешендерінің құрылыс-жөндеу жұмыстарымен танысып, тұрғындармен жүздестім. Аудан активімен өткен жиында маңызды мәселелер талқыланды.

• 24.02.2022
• 281