Сарапшылармен нәтижелі басқосу

Ағымдағы жылдың 25-ақпанында сарапшылармен кездесу барысында өзім басқаратын Стратегиялық жоспарлау және реформалар агенттігінің ағымдағы қызметі мен құрылымдық және институционалдық реформаларды қалыптастыру жөнінде айтып бердім.

Елімізде құрылған әлеуметтік-экономикалық жүйе ұлттық табыстың жалпы өсімін қамтамасыз етуде жеткілікті тиімділікті көрсетті, бірақ оны бөлу тиімсіз болып отыр. Халықтың табысы экономика өсімі есебінен емес, әлеуметтік трансферттер есебінен артуда. Халықтың жалпы кірістерінде еңбек кірістерінің үлесі 80% - дан 67% - ға дейін қысқарды, ал әлеуметтік трансферттер 17% - дан 29% - ға дейін өсті. Бұл теңсіздікті төмендету үшін әлеуметтік, экономикалық және саяси салалардағы реформалар қажет екендігі сөзсіз.

Қазіргі уақытта Агенттік әртүрлі мемлекеттік органдардың, сарапшылар қоғамдастығының, халықаралық мамандардың және азаматтық сектордың қатысуымен мемлекеттік басқару жүйесін бюрократиядан арылту, сондай-ақ квазимемлекеттік сектор мен ұлттық статистика жүйесін реформалаудың кешенді жүйесін қалыптастыруда. 

Статистикадағы жаңа тәсілдер келетін болсақ, ақпаратты жинау мен өңдеуде цифрлық технологияларды енгізуді, ауқымды деректерді қолдануды ескере отырып, ұлттық статистиканы қалыптастыру процесін жетілдіру қажет.  

Қазір ЭЫДҰ-ның "үздік өмір Индексі" (Better Life Index) көрсеткішін енгізу мүмкіндігі қарастырылуда. Индекс халықтың табысын ғана емес, сонымен қатар тұрғын үй жағдайларын, жұмыспен қамтуды, білім беру мен денсаулық сақтауға қолжетімділікті, әлеуметтік қолдау сапасын, азаматтардың қауіпсіздігін де кешенді түрде ескереді.

ҚР Президенті Қасым-Жомарт Тоқаев мемлекеттік аппаратты сапалы трансформациялау қажеттігін атап өткен болатын. Мемлекеттік органдар жұмысының тиімділігін арттыруға, адаморталық тәсілді қолдануға, сыбайлас жемқорлық көріністерін азайтуға, сондай-ақ мемлекеттік функцияларды кеңістікте орталықсыздандыруға баса назар аудару қажет.

Жаңа міндеттерді ескере отырып, негізгі реформалар мен стратегиялық даму мәселелерін іске асыру жөніндегі жүйелі бастамаларды пысықтаумен айналысатын Талдамалық блокты күшейте отырып, Агенттіктің құрылымы қайта қаралатын болады.

Кездесу соңында жаңа тәсілдер мен институционалдық реформалар ағымдағы жылдың бірінші жартысында жарияланатынын атап өтіп, сарапшыларды оларды қалыптастыруға белсенді қатысуға шақырдым.

• 28.02.2022
• 237