Сот сараптамалары орталығы қайырымдылық акциясын өткізді

Ұлыстың Ұлы күні - "Әз Наурыз" мерекесі қарсаңында ҚР Әділет министрлігінің Сот сараптамалары орталығы "Қайырымды ұлт" іс-шарасы аясында Нұр-Сұлтан қаласындағы "Шанс" кәмелетке толмағандарды әлеуметтік-құқықтық қолдау орталығында қайырымдылық акциясын өткізді.

Аталған Орталық тұрмысы қолайсыз отбасылардың балаларына, тұрмыстық зорлық-зомбылық құрбандарына және қандай да бір мән-жайлар бойынша қиын өмірлік жағдайға тап болған азаматтарға көмек көрсетеді.

Орталық директорының сот-медициналық мәселелер жөніндегі орынбасарының міндетін атқарушы А.Т. Бабықпаеваның басшылығымен Сот сараптамалары орталығының өкілдері "Шанс" орталығының еріктілерімен және қызметкерлерімен кездесті.

Қайырымдылық көмек ретінде қажетті керек-жарақтарды: жеке гигиеналық заттарын, ыдыс-аяқтарды, тұрмыстық химия және т. б. заттарды тапсырды.

Кездесу жылы және достық жағдайда өтті, әлеуметтік ұйым қызметкерлері өз проблемалары мен болашаққа жоспарларымен бөлісті, өз қамқорлығындағы балалардың өмірі мен тағдырлары, олардың табыстары мен жетістіктері туралы айтты.

Сот сараптамалары орталығы қажет болған жағдайда "Шанс" орталығының қамқорлығындағы адамдарға психологиялық оңалтуды жүргізу кезінде, сондай-ақ осы адамдарға қатысты сот сараптамалары тағайындалған жағдайларда консультациялық көмек көрсететін болады.

• 18.03.2022
• 340