Құрметті жерлестер!

Баршаңызды жаңару мен жаңғырудың бастауы болған Ұлыстың ұлы күні – Наурыз мейрамымен шын жүректен құттықтаймын!

Тамыры тереңнен бастау алатын әз Наурыз дана халқымызда қай кезде де еңсесі биік елдіктің, іргесі сөгілмес бірліктің, ырыс пен ынтымақтың мерекесі болып келген.

Дастарқанға ақ толатын, елімізге бақ қонатын бүгінгі арайлы шақты халқымыз Ұлыстың ұлы күні деп ұлықтаған.

Күн мен түнді теңеген, іргемізді ізгілікке бөлеген Ұлыстың ұлы күні бүкіл адамзатқа шаттық сыйлап, көңілдеріне қуаныш ұялатқан.

Наурыз – көктемгі жаңарудың, махаббаттың, ақ пейіл мен татулықтың мерекесі.

Мемлекет басшысы Қасым-Жомарт Тоқаев «Тәуелсіздік – бәрінен қымбат» атты мақаласында Наурыз мейрамының тұжырымдамасын әзірлеп, көктем мерекесінің мән-маңызын арттыра түсуді тапсырды. 

Бүгінде елімізде Ұлыстың ұлы күні 10 күн бойы тойлануда. Мерекелік іс-шаралар бейбітшілік пен достықты нығайтуға, ұлттық бірегейлікті сақтауға, отбасылық құндылықтарды насихаттауға, қоршаған ортаға деген құрметті дамытуға бағытталған. 

Бұл күндері жамбылдықтар аулаларын тазартып, ретке келтіріп, ағаш көшеттерін отырғызып, бұлақтардың көзін ашып, бір-біріне жақсылық пен тыныштық тілейді. Халық даналығы «Бірлік бар жерде тірлік бар» деп бекер айтпаса керек. 

Наурыз мейрамы Тәуелсіздік жылдары ұлысты ұйыстыра түсті. Ұлы өркениетімізден тамыр тартқан Ұлыстың ұлы күнін қазіргі уақытта тек біздер ғана емес, әлем халықтары да бірге атап өтуде. Біріккен Ұлттар Ұйымының Наурызды халықаралық мереке ретінде қабылдауы да кездейсоқ емес.

Сондықтан да түсіністікті ту етіп, елді бірлік пен ынтымаққа, адамгершілік пен имандылыққа үндейтін Ұлыстың ұлы күнінің татулығы жарасқан еліміз үшін маңызы айрықша. 

Бүгінгі мерейлі мереке қарсаңында дендеріңізге саулық, отбасыларыңызға бақ пен береке, шаңырақтарыңызға шаттық тілеймін!

• 04.04.2022
• 228