Құрметті жерлестер!

Баршаңызды мұсылман қауымы асыға күтетін он екі айдың сұлтаны, берекелі де кешірімі мол қасиетті Рамазан айының келуімен құттықтаймын!

Бұл ай – рухани жаңару мен жаңғыру, кемелдену кезеңі.

Отыз күн Оразада баршамыз туған-туыстарымыз мен бауырларымызға қамқорлық көрсетіп, мұқтаж жандарға мүмкіндігінше қол ұшын созуымыз керек.

Халқымыздың мәдениетінің алтын өзегі Ислам дінінің негізінде ғасырлар бойы қалыптасқан біздің діни таным-тарихымыздың тамыры ешқашан үзілген емес. Сол себепті ата-бабамыз ұстанған дәстүрлі дініміздің қадір-қасиетін жас ұрпақтың санасына сіңіріп, олардың бойына киелі Отаны мен қасиетті жеріне деген ыстық ықыласты, сүйіспеншілікті қалыптастыруымыз қажет.

Мемлекет саясатының арқасында елімізде сақталып отырған қоғамдағы татулық, бірлік, өзара түсіністік, этносаралық және дінаралық келісім – біздің басты байлығымыз.

Қадірлі жерлестер!

Қасиетті Рамазан айы бәріңізге жақсылық, құт-береке әкелсін!

Тұтқан оразаларыңыз, жасаған құлшылықтарыңыз, дұға-тілектеріңіз қабыл болып, Алла тағала отбасымызға амандық, елімізге береке-бірлік, жерімізге тыныштық нәсіп етсін!

• 04.04.2022
• 242