Азаматтарды қабылдау өтті

Сенбі күні облыс әкімі Ғали Есқалиев азаматтарды жеке мәселелері бойынша қабылдады. Қабылдауда қойылған сұрақтарға сәйкес қала және аудан әкімдіктері мен басқарма басшылары қатысты.

Қабылдауға келген тұрғындар өтініші мен ұсынысының дені тұрғын үй мәселесі, жер телімі, кәсіпкерлікті қолдау, спортты дамыту, тұрғын үй шаруашылығы мәселелері бойынша болды.

Облыс әкімінің қабылдауына мүмкіндігі шектеулі азамат Сариев Санат тұрғын үй мәселесі бойынша жүгінді. Аталған азамат кезек бойынша 2018 жылы 1 бөлмелі пәтер алған. Күні бүгін отбасы санының көбеюіне байланысты пәтерін ауыстырғысы келеді. Облыс әкімі екінші қайтара пәтер беруге немесе берілген пәтерді ауыстыруға заңды негіз жоқ екенін ескертті.

Сондай-ақ, облыс әкімінің қабылдауына келгендердің бірі Зашаған кенті Мөңкеұлы көшесі нөмірі 85/2 тұрғын үйдің тұрғыны Борзикова Александра болды. Айтуынша тұрып жатқан көпқабатты тұрғын үйінің төбесінен су ағады. Мән-жайды түсіндіріп, мердігер компанияға, құзырлы органдарға барғанымен әлі күнге еш нәтиже жоқ. Облыс әкімі Ғ.Есқалиев бұл аталған тұрғын үй кешені “Болашақ-Т” құрылыс компаниясына тиесілі екенін, құрылыс 2015 жылы аяқталып, мердігер мекемеге берілген 2 жыл кепілдік мерзімі аяқталғанын айтып, ендігі кезекте тұрғын үйді жөндеу тұрғындардың қаржысына немесе “Нұрлы жер” тұрғын үй кешенін жаңғырту бағдарламасы арқылы жөндеу мүмкін екендігін жеткізді.

Қабылдауға келген өзге де тұрғындардың
сұрақтарын өңір басшысы егжей-тегжейлі қарап, жан-жақты қолдау көрсетіп, жеке бақылауына алды.

• 14.04.2022
• 225