Наурызым ауданында халықпен кезекті кездесу өтті

Аудан тұрғындарын ең алдымен ТКШ, жолдарды және үйлердің қасбеттерін жөндеу мәселелері алаңдатты. Кейбір мәселелерді шешу үшін көп уақыт қажет, ал басқаларын тез арада қарастыруға болады. Кездесу барысында облыс әкімі Архимед Мұхамбетов халық көтерген бірқатар мәселесіні сол жерде шешіп берді.

Мысалы, биыл Қарамеңді ауылы тұрғындарының өтініші бойынша жаңа хоккей корты салынады. Осы жылдың қыркүйек айында пайдалануға беру жоспарланып отыр.

Ағымдағы жылы "Балдырған" балабақшасын жөндеуге 50 млн.теңгеден астам қаражат бөлінбек. Жөндеу жұмысы барысында терезелер, шатырды жөндеу және жылыту жүйелері ауыстырылады.

Жалпы ауданда атқарылған жұмыс аз емес. Халықтың өмір сапасын арттыру мақсатында аудандық аурухананы материалдық-техникалық жабдықтауды жақсарту үшін 2021 жылы жергілікті бюджеттен 45 млн.теңге бөлінді. Бұл ақшаға вакцинация үшін тоңазытқыштар, мұздатқыштар сатып алынды.

Сонымен қатар, сапалы медициналық қызмет көрсету үшін қосымша жаңа флюорографиялық аппарат, зертханаға арналған гематологиялық анализатор, электрокардиограф, функционалдық реанимациялық кереуеттер сатып алынды.

Бұдан басқа, 2021 жылы Өлеңді, Дәмді және Мереке ауылдарын орталық сумен жабдықтау үшін су тарату пункттері орнатылды. 2022 жылы халықты сапалы ауыз сумен қамтамасыз етуге Шилі, Қожа, Жамбыл ауылдарында су тарату пункттерін орнату жоспарланған.

Сонымен қатар, өңір басшысы азаматтарды жеке мәселелері бойынша қабылдады.

Кездесу қорытындысы бойынша Архимед Мұхамбетов аудан әкіміне ауданды дамыту, абаттандыру және халықты жұмыспен қамту мәселелеріне ерекше назар аударуды тапсырды.

• 27.04.2022
• 176