Байзақ ауданының даму жоспары

Бүгін Байзақ ауданының даму жоспарымен таныстым. Кеңес барысында аудан әкімі Бақыт Қазанбасовтың жоспарлы жобалар мен өзекті мәселелер туралы баяндамасы тыңдалды.

Аудандағы барлық елді мекендерді газдандыру мәселесі биыл толығымен шешілмек, ал ауыз сумен қамту алдағы төрт жылда 100 пайызға орындалмақ.

Бұдан бөлек, 2025 жылға дейін инвестициялық 7 ірі және 101 шағын жобаны жүзеге асыру көзделуде. Нәтижесінде жалпы 1250-ге жуық жаңа жұмыс орындары ашылады.
Әр жобаны жеке-жеке талқылап, ол бойынша тиісті басқармалар мен аудандық бөлім басшылары, ауылдық округ әкімдерін тыңдадым.

Бюджеттік жобалармен шектелмей, бізге қосымша қаражат көздерін табу, инвесторлар тарту қажеттігін ескерттім.

Ең бастысы – тұрғындардың тұрмысын жақсарту, табысын арттыру. Мемлекет басшысының әрбір 10 мың тұрғынға 100 жаңа жұмыс орнын құру тапсырмасы орындалуы тиіс. Әр отбасының тұрақты табысы болуы маңызды.

Сондай-ақ, жиын барысында басқарма басшылары мен аудан әкімдеріне халықпен тығыз қарым-қатынаста жұмыс істеудің маңыздылығын атап өттім. Олар мәселені анықтап қана қоймай, оның шешу жолдарын да зерделеп, ұсыну қажет.
Бірқатар жобаларды салалық басқармалармен бірлесіп, қайта саралап, жан-жақты қарастыруды тапсырдым.

• 13.05.2022
• 203