Салалық басқармалардың есебі

Облыс әкімдігіне қарасты салалық басқармалардың есебін тыңдауды бастадым.

Бұған дейін Тараз қаласы мен аудандардың даму жоспарларымен жеке-жеке танысып, тұрғындардың тұрмысын арттыру, инвестициялық жобаларды жүзеге асыру, өзекті мәселелерді шешу бойынша жауаптыларға нақты тапсырмалар жүктеген болатынмын.

Бүгін ең алдымен энергетика және тұрғын үй-коммуналдық шаруашылық пен жолаушылар көлігі және автомобиль жолдары басқармаларының басшыларын қабылдап, атқарылған жұмыстар мен жоспарларды талқыладық.

2025 жылға дейін облыс тұрғындарын таза ауыз су және табиғи газбен қамту мәселесі толығымен шешілуі тиіс. Негізгі жұмыстар алдағы 2022-2023 жылдары атқарылуы қажет. Осы бойынша басшыларға жобалардың басым бөлігін алдағы екі жылға жоспарлауды тапсырдым. Бұл қала маңындағы тұрғын алқаптарға да қатысты.

Халық саны аз ауылдарды да инфрақұрылыммен қамту мәселесіне назар аударып, әлеует пен мүмкіншілікті қарастыру керек. Біз ол ауылдарға қажетті жағдай жасау арқылы ғана жастардың сонда тұрақтап, халықтың шоғырлануын қалыптастыра аламыз.

Сондай-ақ, аймақтағы жолдарды жөндеу жұмыстарында сапаға айрықша ден қоюға тиіспіз. Бір жолды жыл сайын жөндейміз деп шығындалуға болмайды.

Жол-көлік оқиғаларының алдын алу, қоғамдық көлік қызметін жетілдіру – өзекті мәселе.
Жауапты тұлғаларға мәселелерді анықтап қана қоймай, оларды тиімді шешу жолдарын да ойластыру міндеттерін жүктедім.

Басқармаларға қатысты кейбір мәселелердің ауқымдылығын ескеріп, электр энергиясымен қамту, тариф саясаты, жылу-энергетика, тұрғын үй-коммуналдық шаруашылық салаларын алдағы уақытта тағы да жеке-жеке, жан-жақты қарастыратын боламыз.

• 13.05.2022
• 244